قازاقستاندا تۇرعىن ءۇي قۇنى تومەندەگەن

ەلىمىزدىڭ ءىرى قالالارىندا باسپانا باعاسى ءبىرشاما تومەندەگەن

قازاقستاندا باسپانا قۇنىنىڭ تومەندەۋى بايقالىپ وتىر، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.

بۇل تۋرالى باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى سەرىك جۇمانعارين ءمالىم ەتتى.

«بۇگىنگى تاڭدا كەزدە باستاپقى تۇرعىن ۇيگە باعالار 3 پايىزدان (بيىلعى قاڭتار) 0،4 پايىزعا دەيىن (بيىلعى شىلدە)، سونداي-اق قايتالاما تۇرعىن ۇيگە 5 پايىزدان (قاڭتار) 1،1 پايىزعا دەيىن (شىلدە) تومەندەگەنى بايقالدى»، - دەدى س. جۇمانعارين ۇكىمەت وتىرىسىندا.

ونىڭ ايتۋىنشا، ەسكەرتۋدى ورىنداۋ اياسىندا «رامس-قازاقستان» كومپانيالار توبى باعالاردى الماتى قالاسىندا ءبىرقاتار تۇرعىن ءۇي كەشەنىنەن شارشى مەتر ءۇشىن 15%-عا نەمەسە 90 مىڭ تەڭگەگە دەيىن، «BAZIS-A» كومپانياسى الماتى قالاسىندا تۇرعىن ءۇي كەشەندەرىنە شارشى مەتر ءۇشىن 20 مىڭ تەڭگەگە دەيىن، «BI Group» نۇر-سۇلتان قالاسىنىڭ 51 كەشەندە باستاپقى تۇرعىن ۇيگە ورتا ەسەپپەن 8 پايىزعا، الماتى قالاسىندا - 11 %-عا، شىمكەنتتە - 3 %-عا، اتىراۋدا - 4 %-عا تومەندەتتى.

«باسقا قۇرىلىس سالۋشىلار دا حابارلامالاردى ورىنداپ، باعالاردى ورتا ەسەپپەن 15-20%-عا تومەندەتتى. باعالاردىڭ تومەندەۋ پايىزى ورتا ەسەپپەن 9%-دى، تومەندەۋ سەرپىنى – شارشى مەترگە 10 000-دەن 125 000 تەڭگەگە دەيىن»، - دەدى اگەنتتىك باسشىسى.