27 ەسىرتكى مەن پرەكۋرسور اتاۋى مەملەكەتتىك باقىلاۋعا الىنادى.
بۇل تۋرالى ءىىم باسپا ءسوز قىزمەتىنىڭ وكىلى شۇعىلا تۇرلىبەك ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«20 ناۋرىزدا ۇكىمەت ءبىرقاتار زاڭعا تاۋەلدى نورماتيۆتىك-قۇقىقتىق اكتىلەرگە وزگەرىستەر مەن تولىقتىرۋلار ەنگىزۋدى كوزدەيتىن اكتىگە قول قويدى. ول قوسىمشا 27 ەسىرتكى مەن پرەكۋرسور اتاۋىن مەملەكەتتىك باقىلاۋعا الۋدى كوزدەيدى. قازىرگى ۋاقىتتا بۇل تىزىمدە اينالىمىن مەملەكەت باقىلايتىن مىڭنان استام زاتتار بار. ءقازىر وعان ەسىرتكى مەن پسيحوتروپتىڭ تاعى 15 اتاۋى، سونداي-اق پرەكۋرسورلاردىڭ 12 اتاۋى جانە ولاردى جاساۋ ءۇشىن قولدانىلاتىن زاتتار ەنگىزىلگەن»، - دەدى شۇعىلا تۇرلىبەك ىشكى ىستەر مينيسترلىگىنىڭ باسپا ءسوز قىزمەتى الاڭىندا وتكەن بريفينگ بارىسىندا.
ونىڭ اتاپ وتۋىنشە، «ءدارىحانالىق» ناشاقورلىقپەن كۇرەسۋ ماقساتىندا پسيحوتروپتىق زاتتاردىڭ ءتىزىمى ترامادولمەن تولىقتىرىلادى. سونداي-اق پسيحوتروپتىق انالگەتيك تە بار. ونى ەسىرتكىگە تاۋەلدىلەر ەيفوريا اسەرىن الۋ ءۇشىن پايدالانادى جانە تۇتاستاي العاندا ول ەسىرتكىگە تاۋەلدىلىكتىڭ قالىپتاسۋىنا ىقپال ەتەدى.
«قىلمىستىق جاۋاپكەرشىلىككە تارتىلاتىن ترامادولدىڭ سالماعى 0،1 گرامم بولىپ بەلگىلەندى. بۇل شاعىن ولشەم، ال 10 گرامعا دەيىن - ۇلكەن ولشەم، 10 گرامنان اسسا اسا ۇلكەن ولشەم سانالادى. ۇكىمەت اكتىسى قولدانىسقا ەنگىزىلگەن سوڭ ترامادول تەك رەسەپت بويىنشا جانە ەسىرتكى قۇرالدارى جانە پسيحوتروپتىق زاتتار اينالىمىنا بايلانىستى قىزمەتكە ليسەنزياسى بار ءدارىحانالىق جانە ەمدەۋ-پروفيلاكتيكالىق ۇيىمداردا عانا بەرىلەتىن بولادى. ترامادولدىڭ زاڭسىز اينالىمى ءۇشىن قىلمىستىق جاۋاپكەرشىلىك قولدانىستاعى زاڭناماعا سايكەس باستالادى»، - دەدى ول.