قازاقستاندا ءتورت كۇن بويى ماگنيت داۋىلى بولادى

ماگنيت داۋىلى ادامدارعا ءتۇرلى اسەر ەتەدى.

ماگنيت داۋىلى 26 جەلتوقسان دۇيسەنبىدەن 29 جەلتوقسان بەيسەنبىگە دەيىن سوزىلادى، دەپ حابارلايدى Almaty-akshamy.kz

26-28ء-ى كۇندەرى بەلسەندىلىك جوعارى، ال 29 جەلتوقساندا داۋىل السىرەيدى.

ماگنيت داۋىلى كۇنتىزبەسى بويىنشا، ءبىر تاۋلىك ۇزىلىستەن كەيىن كۇننىڭ بەلسەندىلىگى قايتادان كۇشەيەدى - جەكسەنبى، 31 جەلتوقساندا ءالسىز ماگنيت داۋىلى بولجاندى. ماگنيت داۋىلى ادامدارعا ءتۇرلى اسەر ەتەدى. اۋا-رايىنا سەزىمتال، سوزىلمالى اۋرۋلارى بارلار جانە قارت ادامدار ونىڭ اسەرىنە سەزىمتال كەلەدى.

ماگنيت داۋىلىنىڭ ءجيى كەزدەسەتىن بەلگىلەرى: باس اۋرۋى، باس اينالۋ، جۇرەك اينۋى مەن قۇسۋ، قان قىسىمىنىڭ جوعارىلاۋى، جۇرەك پەن بۋىنداردىڭ اۋىرۋى، شارشاۋ، ۇيقىسىزدىق.

ماگنيت داۋىلىنا قالاي دايىندالۋ كەرەك؟

ماگنيت داۋىلى قارساڭىندا ارتىق جۇمىس ىستەمەي، كۇنىنە كەم دەگەندە ءبىر ساعات تازا اۋادا بولعان دۇرىس. جەڭىل تاماق ءىشىپ، تەمەكى شەگۋدى، الكوگولدى ءىشۋدى شەكتەۋ كەرەك. ۇيقىڭىز جەتكىلىكتى بولسىن. تاڭەرتەڭ جەڭىل جاتتىعۋ جاساڭىز. سوزىلمالى اۋرۋلارى بار ادامدار قاجەت دارى-دارمەگىن الىپ قويۋى كەرەك.

داۋىلدىڭ جاعىمسىز اسەرىنەن قالاي قورعانۋعا بولادى

داۋىلدىڭ اعزاعا كەرى اسەرىن ازايتۋ ءۇشىن قارقىندى فيزيكالىق بەلسەندىلىكتى شەكتەڭىز، كوبىرەك دەمالىڭىز، تازا اۋادا سەرۋەندەپ، جاقسى ۇيىقتاڭىز. دۇرىس تاماقتانۋ قاجەت: بالىق، كوكونىس، جارما، كوبىرەك سۋ.

ماگنيت داۋىلى كەزىندە نە ىستەۋگە بولمايدى؟

كوفە، الكوگول، تەمەكى شەگۋدەن باس تارتىڭىز. سترەسسكە بەرىلمەڭىز، جانجالدى جاعدايلاردان اۋلاق بولىڭىز. زەيىن مەن نازار اۋدارۋدى قاجەت ەتەتىن جۇمىستى قابىلداماڭىز. كولىك جۇرگىزۋدى شەكتەڭىز.