«جولاۋشىلار تاسىمالى» اق جولاۋشىلاردىڭ قاۋىپسىزدىگىن كۇشەيتۋ ماقساتىندا 24 Talgo پويىزىنىڭ ۆاگوندارىنا بەينەباقىلاۋ جۇيەسىن ورناتۋدى تولىقتاي اياقتادى. بارلىعى 1 350 كامەرا ىسكە قوسىلىپ، پويىز ىشىندەگى جاعداي تاۋلىك بويى ۇزدىكسىز باقىلانۋدا، دەپ حابارلايدى aqshamnews.kz
بەينەباقىلاۋ جۇيەسى ۆاگوندار، كىرەبەرىستەر مەن شىعابەرىستەر، ورتاق پايدالانىلاتىن اۋماقتاردى قامتيدى. بۇل شارالار وقىس وقيعالاردىڭ الدىن الۋعا، قۇقىقبۇزۋشىلىقتاردى بولدىرماۋعا، بيلەتسىز جولاۋشىلاردى انىقتاۋعا جانە كەز كەلگەن توتەنشە جاعدايعا جەدەل ارەكەت ەتۋگە مۇمكىندىك بەرەدى.
جۇيەدەن الىنعان اقپارات تەك ۇلتتىق تاسىمالداۋشىنىڭ سيتۋاسيالىق ورتالىعىنداعى ۋاكىلەتتى ماماندارعا عانا قولجەتىمدى. بەينەماتەريالدار جولاۋشىلار شاعىمدارىن ءادىل ءارى جان-جاقتى قاراۋ ءۇشىن قولدانىلادى.
ۇلتتىق تاسىمالداۋشى بارلىق ستاندارتتى ۆاگونداردى بەينەباقىلاۋ جۇيەسىمەن جابدىقتاۋدى جوسپارلاپ وتىر. سونىمەن قاتار، جولاۋشىلار پويىزدارىندا ينتەرنەتتى ىسكە قوسۋ ارقىلى ناقتى ۋاقىت رەجيمىندە بەينەباقىلاۋ جۇرگىزۋ جانە بەينەاناليتيكا جۇيەسىن ەنگىزۋ مۇمكىندىكتەرى قاراستىرىلۋدا.