قازاقستاندا تاعى ءبىر مەرەكە بەلگىلەنۋى مۇمكىن

«قازاقستان ستۋدەنتتەرىنىڭ اليانسى» رەسپۋبليكالىق  قوزعالىسىنىڭ  جەتەكشىسى  ءىلياس تۇستىكبايەۆ ستۋدەنتتەر  كۇنىن رەسمي تۇردە بەكىتۋدى ۇسىندى.

ءبىلىم جانە عىلىم ءمينيسترى اسحات ايماعامبەتوۆپەن بولعان كەزدەسۋ كەزىندە ستۋدەنتتىك اليانستىڭ باسشىسى جاڭا مەيرامدى 14 ساۋىرگە بەلگىلەۋ قاجەتتىگىن ايتتى، دەپ حابارلايدى Almaty-akshamy.kz

كەزدەسۋگە قاتىسقان ءبىلىم جانە عىلىم ءمينيسترى اسحات ايماعامبەتوۆ اليانس ۇسىنىسىنا قاتىستى پىكىر بىلدىرگەن جوق.

«ءبىز 17 قاراشا كۇنى كەزدەسىپ تۇرامىز. ول كۇنى الەم بويىنشا حالىقارالىق ستۋدەنتتەر كۇنى اتالىپ وتەدى. ال كورشى رەسەيدە ستۋدەنتتەر كۇنى 25 قاڭتاردا تويلانادى. سەبەبى رەسەي پرەزيدەنتى وسى مەيرامدى ارنايى قاۋلىمەن بەكىتكەن. ال قازاقستاندا ونداي داتا جوق. وسىعان بايلانىستى 14 ءساۋىردى رەسمي تۇردە قازاقستان ستۋدەنتى كۇنى رەتىندە بەكىتىپ، جىل سايىن اتاپ ءوتۋدى ۇسىنامىز»، - دەدى تۇستىكبايەۆ.

ونىڭ ايتۋىنشا، ستۋدەنتتەردىڭ بولەك مەيرامىن بەكىتۋدىڭ ناتيجەسىندە جاستاردىڭ بىرلىگى كۇشەيە تۇسەدى. ولار ءتول مەيرامىندا كەزدەسىپ، تىعىز ارالاسادى. جاستاردىڭ ءپاتريوتيزمى دە ارتادى.