سۋ رەسۋرستارى جانە يرريگاسيا مينيسترلىگى قۇرىلادى. بۇل تۋرالى پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىن جاريالاعان مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«سۋ ۇنەمدەيتىن تەحنولوگيالاردى ەنگىزۋ – اسا ماڭىزدى جانە شۇعىل مىندەت. سوندىقتان ءتيىمدى تاسىلدەر ۇسىنۋ قاجەت. دەگەنمەن ءبىز ءدال قازىرگى جاعدايدا جاڭا تاريف ساياساتىنان دا اتتاپ وتە المايمىز. ابدەن ەسكىرگەن ينفراقۇرىلىم ارەڭ جۇمىس ىستەپ تۇر. سوندىقتان جاڭا ينفراقۇرىلىم سالۋ – وتە ماڭىزدى مىندەت، قازىرگى نارىقتىڭ تالابى. سۋدى نورماتيۆتەن ارتىق جۇمساعاندار ونىڭ اقىسىن جوعارى تاريفپەن تولەۋى كەرەك. ءبىر سوزبەن ايتساق، سۋدى بارىنشا ۇنەمدەۋىمىز قاجەت. وعان قوسا سۋدىڭ «كولەڭكەلى» نارىعى تۇبىرىمەن جويىلۋعا ءتيىس. حالقىمىز «سۋدىڭ دا سۇراۋى بار» دەپ بەكەر ايتپاعان»، - دەدى پرەزيدەنت.
مەملەكەت باسشىسى سۋ دەگەنىمىز – ۇنەمدەپ پايدالانباسا، تەز تاۋسىلاتىن شەكتەۋلى رەسۋرس ەكەندىگىنە ايرىقشا نازار اۋدارتتى.
«ونسىز شارۋالاردىڭ كۇنى قاراڭ. سول سەبەپتى بۇل سالادا زاڭسىزدىققا جول بەرىلمەيدى. تالاپقا باعىنبايتىندار قاتاڭ جازاعا تارتىلادى. ەلىمىز ءۇشىن سۋدىڭ ماڭىزى مۇناي، گاز نەمەسە مەتالدان كەم ەمەس. سۋ شارۋاشىلىعى جۇيەسىن ءتيىمدى دامىتۋ ماسەلەسىمەن دەربەس مەكەمە اينالىسۋى قاجەت دەپ سانايمىن. سوندىقتان سۋ رەسۋرستارى جانە يرريگاسيا مينيسترلىگى قۇرىلادى»، - دەدى قاسىم-جومارت توقايەۆ.