پرەزيدەنت قاسىم-جومارت توقايەۆ ەلىمىزدە تاريف ساياساتىن قايتا قاراپ، مونوپوليستەرگە جاۋاپكەرشىلىكتى كۇشەيتۋ كەرەكتىگىن ايتتى، دەپ حابارلايدى قازاقپارات ءتىلشىسى.
«تاريف ساياساتىن تۇبەگەيلى قايتا قاراۋ، تاريف بەلگىلەۋدىڭ جاڭا ادىستەمەسىن ەنگىزۋ جانە ينۆەستورلاردىڭ قىزىعۋشىلىعىن ارتتىرۋ قاجەت. تابيعي مونوپوليا سۋبەكتىلەرىنىڭ بارىنە 5-7 جىلعا دەيىن كوڭىلگە قونىمدى نارىقتىق تاريف ەنگىزگەن ءجون، ياعني باعا تۇراقتى بولسا، ينۆەستيسيانى ناقتى جوسپارلاۋعا مۇمكىندىك تۋادى»، - دەدى قاسىم-جومارت توقايەۆ قازاقستان حالقىنا جولداۋىندا.
پرەزيدەنتتىڭ ايتۋىنشا، قارجى ۇيىمدارى دا كاسىپورىندارعا نىق سەنىممەن نەسيە بەرە الادى.
«سونىمەن قاتار، مونوپوليستەردىڭ جاۋاپكەرشىلىگىن ەداۋىر ارتتىرۋ قاجەت. بۇل سالاعا سيفرلىق باقىلاۋ تاسىلدەرى ەنگىزىلەدى. سول ارقىلى ازاماتتارىمىز تاريفتىك سمەتا جانە ينۆەستيسيالىق باعدارلامالار تۋرالى اقپارات الادى»، - دەيدى مەملەكەت باسشىسى.