كاسىپورىن Skoda Holdingء-تىڭ قۇرامىنا كىرەدى.
پرەمەر-مينيستر ءاليحان سمايىلوۆ Skoda Transportation كومپانياسىنىڭ ديرەكتورلار كەڭەسىنىڭ ءتوراعاسى ديدە پفلەگەرمەن كەلىسسوز جۇرگىزدى، دەپ حابارلايدى Almaty-akshamy.kz ۇكىمەتتىڭ رەسمي رەسۋرسىنا سىلتەمە جاساپ.
تاراپتار رەسپۋبليكادا تەمىرجول جانە قالالىق قوعامدىق كولىك شىعارۋ، تەحنيكالىق قىزمەت كورسەتۋ جانە جاڭعىرتۋ جونىندەگى جوبالاردى ىسكە قوسۋ پەرسپەكتيۆالارىن تالقىلادى.
پرەمەر-مينيستر ينۆەستورلار ءۇشىن ءتۇرلى سالىقتىق جانە كەدەندىك جەڭىلدىكتەر قاراستىرىلعانىن ەسكەرە وتىرىپ، كومپانيانىڭ ەلىمىزدە ناقتى جوبالاردى جۇزەگە اسىراتىنىنا سەنىم ءبىلدىردى. وسى ورايدا ول لوكاليزاسياسى جوعارى جانە تولىق سيكلدى ءوندىرىس اشۋ ماسەلەسىن قاراستىرۋدى ۇسىندى.
«قازاقستان ۇكىمەتى ماشينا جاساۋ سالاسىنا ەرەكشە كوڭىل بولەدى، سوندىقتان ءبىز شەتەلدىك ارىپتەستەرمەن ىنتىماقتاستىق ورناتۋعا مۇددەلىمىز. سونداي-اق بىرلەسكەن جوبالاردى ىسكە اسىرۋعا قازاقستاندىق ماشينا جاساۋ كاسىپورىندارىن تارتۋعا بولادى دەپ سانايمىز»، - دەدى ءاليحان سمايىلوۆ.
ول Skoda Transportation كومپانياسىمەن ءوزارا ءتيىمدى ىقپالداستىقتى پىسىقتاۋ ءۇشىن بارلىق مۇددەلى مەملەكەتتىك ورگاندار مەن ۇيىمداردىڭ قاتىسۋىمەن ارنايى جۇمىس توبى قۇرىلعانىن اتاپ ءوتتى.
ءوز كەزەگىندە ديدە پفلەگەر كومپانيا جاڭا نارىقتاردى باعىندىرۋعا دايىن ەكەنىن، سوندىقتان ءوز وندىرىستەرىن ورنالاستىرۋ جانە دامىتۋ ءۇشىن قازاقستاندى پەرسپەكتيۆتى سەرىكتەس رەتىندە قاراستىرىپ وتىرعانىن اتاپ ءوتتى.
كەزدەسۋ قورىتىندىسى بويىنشا تاراپتار ءوزارا ءتيىمدى جوبالاردى ازىرلەۋ بويىنشا بەلسەندى جۇمىستى جالعاستىرۋ جونىندە كەلىستى.
چەحيالىق Skoda Transportation ماشينا جاساۋ كومپانياسى – ءار ءتۇرلى كولىك تۇرلەرىن، ونىڭ ىشىندە مەترو، ترامۆاي، تروللەيبۋس، تەمىرجول ۆاگوندارى، ەلەكتر پويىزدارى مەن ەلەكتر اۆتوبۋستارىن شىعاراتىن جەتەكشى ەۋروپالىق وندىرۋشىلەردىڭ ءبىرى. كاسىپورىن Skoda Holdingء-تىڭ قۇرامىنا كىرەدى.