قازاقستاندا سيفرلىق تەڭگە شىعادى

وسى ماقساتتا پيلوتتىق جوبا ىسكە قوسىلعان.

قازىرگى تاڭدا دايىندىق جۇمىستارى جۇرگىزىلىپ جاتىر. بيىل ۇلتتىق بانك پايدا مەن شىعىندى ەسەپتەپ، سيفرلىق تەڭگەنى ەنگىزۋ بويىنشا سوڭعى شەشىمدى قابىلدايدى. بۇل تۋرالى ۇلتتىق بانك ءتوراعاسى عالىمجان ءپىرماتوۆ ايتتى، دەپ حابارلايدى Almaty-akshamy.kz Inbusiness.kz سىلتەمە جاساپ.

ونىڭ ايتۋىنشا، 2021 جىلعى قاراشادا ۇلتتىق تولەم جۇيەسىنىڭ قۇرامداس بولىكتەرى بولىپ سانالاتىن كارتوچكالىق ترانزاكسيالاردى وڭدەۋگە ارنالعان تولەم كارتوچكالارىنىڭ بانكارالىق جۇيەسى جانە موبيلدىك ونلاين تولەمدەرگە قىزمەت كورسەتۋگە ارنالعان جەدەل تولەمدەر جۇيەسى پيلوتتىق رەجيمدە ىسكە قوسىلعان. 

«ۇلتتىق تولەم جۇيەسىنىڭ جۇمىس ىستەۋى ءۇشىن قاجەتتى نورماتيۆتىك-قۇقىقتىق بازا ازىرلەندى. بيىل 1 شىلدەگە قاراي ونى تولىق ىسكە قوسۋدى جوسپارلاپ وتىرمىز»، - دەدى عالىمجان ءپىرماتوۆ. 

وتكەن جىلى ۇلتتىق بانك سيفرلىق تەڭگەنى ەنگىزۋ ءۇشىن پيلوتتىق جوبانى ىسكە قوسقان. 

«بۇگىندە پلاتفورمانىڭ ءپروتوتيپىن ازىرلەۋ اياقتالدى. 2021 جىلعى جەلتوقساندا پيلوتتىق جوبانىڭ ناتيجەلەرى بويىنشا قورىتىندى بايانداما جاريالاندى. بيىل پايدا مەن شىعىندى ەسەپتەپ، سيفرلىق تەڭگەنى ەنگىزۋ مودەلى بويىنشا قورىتىندى شەشىم شىعارىلادى»، - دەدى ۇلتتىق بانك ءتوراعاسى.