پەرسپەكتيۆالى اۋىلدىق ەلدى مەكەندەردە ءموبيلدى ينتەرنەتتىڭ ساپاسى جاقسارادى
بۇل تۋرالى ۇكىمەتتىڭ كەڭەيتىلگەن وتىرىسىندا ق ر پرەمەر-مينيسترى ءاليحان سمايىلوۆ مالىمدەدى، دەپ حابارلايدى Almaty-akshamy.kz.
«پەرسپەكتيۆالى اۋىلدىق ەلدى مەكەندەردە «سيفرلىق تەڭسىزدىكتى» بولدىرماۋ ءۇشىن ءموبيلدى ينتەرنەتتىڭ ساپاسى ارتتىرىلاتىن بولادى. سونداي-اق ءىرى قالالاردا 5G بايلانىس تەحنولوگيالارىن ىسكە قوسۋ جانە شالعاي ەلدى مەكەندەردى ينتەرنەتپەن قامتاماسىز ەتۋ ءۇشىن گەوستاسيونارلىق ەمەس سپۋتنيكتىك جۇيەلەردىڭ جۇمىسى جوسپارلانۋدا»، - دەدى ءاليحان سمايىلوۆ.
ول سونداي-اق تۋريزم سالاسىندا ەل اۋماعىنداعى نەگىزگى تۋريستىك دەستيناسيالاردا ينۆەستيسيالىق جوبالاردىڭ ىسكە اسىرىلاتىنىن اتاپ ءوتتى. كارانتيندىك شەكتەۋلەردىڭ الىنىپ تاستالۋىنا قاراي، اعىمداعى جىلى 500 مىڭعا جۋىق سىرتتان كەلەتىن تۋريستەردى تارتۋ جوسپارلانۋدا. لوگيستيكا جانە ساۋدا سالاسىندا ترانسشەكارالىق حابتاردى دامىتۋدىڭ ءبىرىڭعاي ستراتەگياسى قابىلدانادى، سونداي-اق ۇلتتىق ەلەكتروندىق ساۋدانى ىنتالاندىرۋ جونىندەگى شارالاردى ىسكە اسىرۋ جوسپارلانىپ وتىر.
«ماگيسترالدىق تەمىرجول جەلىلەرىنىڭ وتكىزۋ قابىلەتى ارتادى، سونداي-اق لوگيستيكالىق قىزمەتتەردىڭ قۇنى تومەندەيدى»، - دەپ قوستى ءاليحان سمايىلوۆ.