قازاقستاننىڭ سيفرلىق كودەكسى جوباسى اياسىندا سيفرلىق دەرەكتەردىڭ ەركىن اينالىمى ءۇشىن جاعداي جاسالادى. بۇل تۋرالى ءماجىلىس دەپۋتاتى، "AMANAT" پارتياسى فراكسياسىنىڭ مۇشەسى ەكاتەرينا سمىشليايەۆا مالىمدەدى، - دەپ حابارلايدى aqshamnews.kz ءتىلشىسى.
بولاشاقتا قالىپتاستىرىلعان جانە يەسىزدەندىرىلگەن دەرەكتەر جيىنتىعى ازاماتتىق قۇقىق وبەكتىسىنە اينالىپ، بيرجادا ساۋدالانۋى مۇمكىن.
سيفرلىق كودەكستە العاش رەت سيفرلىق دەرەكتەردىڭ ەركىن اينالىمى قاعيداتى بەكىتىلىپ وتىر.
"سيفرلىق دەرەكتەردىڭ ءوزى، ەگەر ولار تىركەلمەگەن، ءبولىپ كورسەتىلمەگەن، سايكەستەندىرىلمەگەن بولسا، ەركىن اينالىم قاعيداتى قولدانىلادى. ياعني جالپى دەرەكتەر اعىنى ەركىن اينالىستا بولادى. تەك قولجەتىمدىلىگى شەكتەۋلى دەرەكتەرگە (قۇپيا، جەكە، كورپوراتيۆتىك دەرەكتەر جانە تاعى باسقا) ارنايى قۇقىقتىق رەجيمدەر قولدانىلادى. بۇل رەجيمدەر بۇرىنعىداي زاڭنامادا ساقتالادى جانە جۇمىس ىستەي بەرەدى"، – دەدى سمىشليايەۆا ءماجىلىستىڭ جالپى وتىرىسىندا.
دەپۋتاتتىڭ ايتۋىنشا، دەرەكتەر بەلگىلى ءبىر پىشىمدە سايكەستەندىرىلىپ، ناقتى داتاسەت تۇرىندە راسىمدەلگەن ساتتەن باستاپ ولار زاڭدىق تۇرعىدان دەرەكتەر ۇعىمىنا ەنەدى.
"وسى ساتتەن باستاپ ءبىز ولاردى ازاماتتىق قۇقىق وبەكتىسى رەتىندە تانيمىز جانە ولار اينالىمعا قاتىسا الادى. بۇل – دەرەكتەر ەكونوميكاسىنداعى بەتبۇرىستى ءسات. سەبەبى دۇرىس قالىپتاستىرىلعان جانە ساپاسى راستالعان مۇنداي داتاسەتتەردى كەيىن مونەتيزاسيالاۋعا مۇمكىندىك تۋادى"، – دەدى ول.
سمىشليايەۆانىڭ ايتۋىنشا، الداعى ۋاقىتتا سيفرلىق دەرەكتەر تولىققاندى بيرجالىق تاۋارعا اينالۋى مۇمكىن.
"كودەكستە دەرەكتەرمەن الماسۋ جانە ولاردىڭ اينالىمى ءۇشىن ارنايى پلاتفورما قاراستىرىلعان. بۇل پروسەستىڭ اشىقتىعىن قامتاماسىز ەتەدى. بولاشاقتا مۇنداي پلاتفورمالار دەرەكتەرمەن ساۋدا جاساۋعا ارنالعان بيرجالىق فورماتقا اينالۋى ىقتيمال. مىسالى، مۇنداي تاجىريبە قىتايدا بار – ول جەردە دەرەكتەر بيرجاسى بەلسەندى دامىپ جاتىر. سونداي-اق ءبىزدىڭ قولدانىستاعى بيرجالار – قور، تاۋار بيرجالارى – دەرەكتەرمەن ساۋدا جۇرگىزۋ ءۇشىن قۇرالدارىن بەيىمدەۋى مۇمكىن. ۋاقىت وتە كەلە ءبىز تولىققاندى دەرەكتەر بيرجاسىنا كوشەمىز دەپ ۇمىتتەنەمىز. ازىرگە پلاتفورمالاردان باستايمىز"، – دەدى دەپۋتات.
جاساندى ينتەللەكت جانە سيفرلىق دامۋ ۆيسە-مينيسترى دميتريي مۋن دەرەكتەردىڭ وركەنيەتتى نارىعىن قالىپتاستىرۋ جولدارىن ءتۇسىندىردى.
"ەڭ الدىمەن دەرەكتەر اينالىمىنىڭ ءوزى اشىق بولادى. ول ارنايى پلاتفورمالاردا جۇزەگە اسادى. بۇل پروسەستى رەتتەۋگە جانە اقپاراتتىق قاۋىپسىزدىك سالاسىنداعى تاۋەكەلدەردى ازايتۋعا مۇمكىندىك بەرەدى. ەكىنشىدەن، دەرەكتەردىڭ ءبىرىڭعاي تىركەلىمدەرى مەن كاتالوگتارى بەكىتىلەدى، ياعني جۇيەلى سيپاتتاما ەنگىزىلەدى. بۇل دەرەكتەر ساپاسىن باعالاۋ تەتىكتەرىن ەنگىزۋگە جول اشادى"، – دەدى مۋن.