كاسىپكەر قايرات بورانبايەۆ "قايرات" فۋتبول كلۋبىن قالاي ساتىپ العانى تۋرالى ايتىپ بەردى، - دەپ حابارلايدى aqshamnews.kz ءتىلشىسى kursiv.media-عا سىلتەمە جاساپ.
بۇل تۋرالى ول ارمانجان بايتاسوۆقا بەرگەن سۇحباتىندا ءبولىستى.
"ءوزىم دە سپورتپەن شۇعىلدانعان اداممىن. "گازپروم" "زەنيت" كلۋبىن باسقارۋىنا العان جىلدار ەدى. كوماندا ساپىندا ارشاۆين، كەرجاكوۆ، دەنيسوۆ سەكىلدى فۋتبولشىلار وينايتىن. ءبىزدى دەمەۋشى رەتىندە ءتۇرلى ماچتارعا شاقىرىپ ءجۇردى. ءتۇرلى كەزدەسۋلەر مەن ماچتاردان كەيىن فۋتبول – ادامداردى بىرىكتىرەتىن كۇش ەكەنىن ءتۇسىندىم"، – دەيدى بورانبايەۆ.
ونىڭ ايتۋىنشا، "قايرات" فۋتبول كلۋبىن ساتىپ الۋ تۋرالى وي الماتى اكىمى قىزمەتىنە احمەتجان ەسىموۆ كەلگەن ۋاقىتتا تۋعان.
"مەنى قالا اكىمى احمەتجان سماعۇل ۇلى كەزدەسۋگە شاقىردى. ول كەزدە "قايرات" ءبىرىنشى ليگادا وينايتىن. اكىم ماعان دەمەۋشى بولۋدى ۇسىندى. ەكى جىل دەمەۋ كورسەتىپ جۇردىك. "قايرات" جوعارى ليگاعا كوتەرىلىپ، تاعى دا سوڭعى ورىن العان كەز. ستاديوندا تاعى دا احمەتجان سماعۇلۇلىمەن كەزدەسىپ قالدىق. مەن ودان كلۋبتى بىزگە بەرۋدى سۇرادىم"، – دەيدى كاسىپكەر.
اڭگىمەنىڭ ءدال وسى تۇسىنا كەلگەندە كلۋب تۋرالى التى مينۋتتىق كولەمدى روليك كورسەتىلدى. وندا "قايرات" 2010 جىلى قيىنشىلىققا تاپ بولعانى، الايدا مۇنداي داعدارىس 2011 جىلى اكسيونەر بورانبايەۆتىڭ كەلۋىمەن اياقتالعانى باياندالادى.
"سول كەزدە ول [ەسىموۆ – رەد.] قارجىعا قاتىستى بىرنەشە تالاپ قويدى. مەن دە ءوز تالابىمدى ايتىپ، قالانىڭ بۇل ىسكە ارالاسپاعانىن سۇرادىم. ەكەۋمىز قول الىسقالى بەرى ءار تاراپ ءوز ۋادەسىندە تۇردى"، – دەپ جالعاستىردى اڭگىمەسىن كاسىپكەر.
بورانبايەۆ "قايرات" ۇلەسى ءۇشىن قانشا تولەدى
ول كەزدە بورانبايەۆ "قازمۇنايگاز" بەن "گازپرومنىڭ" بىرلەسكەن كومپانياسى – "قازروسگاز" باس ديرەكتورى قىزمەتىن اتقاراتىن. 2012 جىلى "قازروسگاز" فۋتبول كلۋبى اكسيالارىنىڭ 70%، قالا اكىمدىگى 30% ۇلەسىنە يە بولعان.
"قازگوسگاز" اكسيالارىن ساتاتىن بولدى. ولارعا فۋتبول كەرەك بولمادى. مەن ساتىپ الۋ تۋرالى ۇسىنىسپەن شىقتىم. ساتىپ الدىم. رەسمي تۇردە اقشاسىن تولەدىم. تەگىن الدى دەگەن اڭگىمەلەر شىعاتىنىن ءتۇسىندىم. ولاي ەمەس. تولەدىم"، – دەدى بورانبايەۆ.
دەگەنمەن سۇحبات بارىسىندا كاسىپكەردىڭ ناقتى قانشا تيىن تولەگەنى تۋرالى ەشتەڭە ايتىلمادى، ءبىراق داعدارعان كلۋبتىڭ شىعىندارى ءسوز بولدى.
"كلۋب بازاسى ورتەنىپ كەتكەن. ودان قالدى 1،2 ملن دوللار قارىزى بولعان"، – دەيدى 59 جاستاعى كاسىپكەر.
اشىق دەرەككوزدەردە كاسىپكەردىڭ الماتىلىق كلۋب ۇلەسى ءۇشىن قانشا تولەگەنى تۋرالى ناقتى مالىمەت جوق. ءبىراق بەس جىل بۇرىن بورانبايەۆ سۇحباتتارىنىڭ بىرىندە 8 ملن دوللار بەرگەنىن ايتىپ قالعان.
قىلمىستىق ءىس جانە نازاربايەۆ وتباسىمەن بايلانىسى
2022 جىلعى ناۋرىزدا قايرات بورانبايەۆ قارجى جىمقىرۋ بويىنشا ءىستى بولدى. 2023 جىلى سوت ونى كىنالى دەپ تانىپ، 8 جىلعا باس بوستاندىعىنان ايىردى. ءبىراق كاسىپكەر قاماۋدا كوپ وتىرعان جوق: مەملەكەتكە كەلتىرگەن شىعىندى وتەۋىنە بايلانىستى شارتتى جازامەن بوساپ شىقتى. قاماۋدا وتىرعاندا جانە كەيىن ول كەن ورىندارى، زاۋىتتارى، قوناق ۇيلەرى مەن ساۋدا ورىندارى سەكىلدى اكتيۆتەرىن مەملەكەتكە وتكىزگەن.
بورانبايەۆ قازاقستاننىڭ بۇرىنعى پرەزيدەنتى نۇرسۇلتان نازاربايەۆتىڭ قۇداسى. 2013 جىلى ەكس-پرەزيدەنتتىڭ نەمەرەسى ايسۇلتان نازاربايەۆ كاسىپكەردىڭ قىزى ءاليما بورانبايەۆاعا ۇيلەنگەن. داريعا نازاربايەۆانىڭ ۇلى ايسۇلتان 2020 جىلعى تامىزدا لوندوندا قايتىس بولعانى ءمالىم.