قازاقستاندا وڭدەۋ ونەركاسىبىن دامىتۋدىڭ 2023–2029 جىلدارعا ارنالعان ستراتەگياسىنىڭ اياسىندا شاعىن ونەركاسىپتىك ايماقتاردى (ءشوا) قۇرۋ باعدارلاماسى بەلسەندى جۇزەگە اسىرىلۋدا.
بۇل — شاعىن جانە ورتا بيزنەستى قولداۋدىڭ جاڭا قۇرالى، كاسىپكەرلەرگە دايىن وندىرىستىك عيماراتتاردى جەڭىلدەتىلگەن جالداۋ شارتتارىمەن ۇسىنۋعا نەگىزدەلگەن، دەپ حابارلايدى aqshamnews.kz.
ءشوا نىساندارى قاجەتتى ينجەنەرلىك جەلىلەرمەن جانە كولىككە ىڭعايلى ينفراقۇرىلىممەن قامتاماسىز ەتىلەدى. مۇنداي جاعدايلار جاڭا جوبالاردى ىسكە قوسۋداعى كەدەرگىلەردى ازايتىپ، بولاشاقتا كاسىپورىنداردىڭ ءتيىمدى جۇمىس ىستەۋىنە مۇمكىندىك بەرەدى.
«QazIndustry» قازاقستاندىق يندۋستريا جانە ەكسپورت ورتالىعى» اق ارنايى ەكونوميكالىق جانە يندۋستريالىق ايماقتاردى دامىتۋ ديرەكسياسى دەرەكتەرى بويىنشا اعىمداعى جىلدىڭ ءبىرىنشى جارتىجىلدىعىنىڭ سوڭىنا دەيىن تۇركىستان وبلىسىندا جالپى اۋماعى 19 مىڭ شارشى مەتر بولاتىن 12 شاعىن وندىرىستىك ايماق ىسكە قوسىلادى دەپ كۇتىلۋدە. جىل سوڭىنا دەيىن وڭىرلەردە تاعى 19 وسىنداي ايماقتى اشۋ جوسپارلانىپ وتىر. 2026 جىلدىڭ ءبىرىنشى توقسانىندا ءۇش ايماق اشىلادى.
جاڭا باعدارلاماعا سايكەس شاعىن ونەركاسىپتىك ايماقتاردى قۇرۋ ءۇش باعىتتا جۇزەگە اسادى: جاڭا وندىرىستىك عيماراتتار سالۋ، بوس تۇرعان ءوندىرىس نىساندارىن قايتا جاڭعىرتۋ (Ready built factory ۇلگىسى بويىنشا) جانە جۇمىس ىستەپ تۇرعان كاسىپورىنداردى كەڭەيتۋ.
باعدارلاما باسەكەگە قابىلەتتى وندىرىستەردى دامىتۋعا، جاڭا جۇمىس ورىندارىن اشۋعا جانە ەل ەكونوميكاسىنداعى شاعىن جانە ورتا بيزنەستىڭ ۇلەسىن ارتتىرۋعا باعىتتالعان. شاعىن ونەركاسىپتىك ايماقتار ارنايى ەكونوميكالىق نەمەسە يندۋستريالىق ايماقتاردىڭ اۋماعىندا دا، ودان تىس جەرلەردە دە قۇرىلۋى مۇمكىن. بۇل كاسىپكەرلەرگە ءوز ءىسىن باستاۋعا نەمەسە كەڭەيتۋگە قوسىمشا مۇمكىندىك بەرەدى.
«QazIndustry» قازاقستاندىق يندۋستريا جانە ەكسپورت ورتالىعىنىڭ مالىمەتىنشە، ينۆەستورلار تاراپىنان بارلىعى ەلىمىزدىڭ سەگىز وڭىرىندە 34 شاعىن ونەركاسىپتىك ايماق قۇرۋ جوباسىن جۇزەگە اسىرۋدا. مۇنداي ايماقتار استانا مەن شىمكەنت قالالارىندا، سونداي-اق سولتۇستىك قازاقستان، قاراعاندى، قوستاناي، جامبىل، قىزىلوردا جانە تۇركىستان وبلىستارىندا قۇرىلماق. بۇل ونەركاسىپتىك ايماقتاردىڭ جالپى اۋماعى شامامەن 265 مىڭ شارشى مەتردى قۇرايدى
باعدارلامانى جۇزەگە اسىرۋ بيزنەسكە ارنالعان دايىن عيماراتتاردىڭ تاپشىلىعى ماسەلەسىن شەشۋگە جول اشادى. شاعىن ونەركاسىپتىك ايماقتار يندۋستريالاندىرۋ مەن ەكونوميكانىڭ وسۋىنە سەرپىن بەرىپ، كاسىپكەرلىكتى قولداۋدىڭ ءتيىمدى تەتىگىنە اينالىپ كەلەدى.