ق ر دسم ساليدات قايىربەكوۆا اتىنداعى ۇلتتىق عىلىمي دەنساۋلىق ساقتاۋدى دامىتۋ ورتالىعى 2025 جىلدىڭ قورىتىندىسى بويىنشا «سالاۋاتتى ءومىر سالتىن ۇستاناتىن قازاقستان رەسپۋبليكاسى ازاماتتارىنىڭ ۇلەسى» كورسەتكىشى بويىنشا جىل سايىنعى ۇلتتىق زەرتتەۋدى اياقتادى، - دەپ حابارلايدى Aqshamnews.kz.
زەرتتەۋ قازاقستان رەسپۋبليكاسىنىڭ دەنساۋلىق ساقتاۋدى دامىتۋ تۇجىرىمداماسىن 2026 جىلعا دەيىن ىسكە اسىرۋ شەڭبەرىندە جۇرگىزىلدى. زەرتتەۋ رەپرەزەنتاتيۆتى حالىق تاڭداۋى نەگىزىندە جۇرگىزىلگەن سوسيولوگيالىق ساۋالناماعا سۇيەنىپ، 17 وبلىس پەن رەسپۋبليكالىق ماڭىزى بار ءۇش قالادان 13 617 رەسپوندەنتتى قامتىدى.
الىنعان دەرەكتەر حالىقتىڭ سالاۋاتتى ءومىر سالتى قاعيداتتارىنا بەيىمدىلىك دەڭگەيىن وبەكتيۆتى باعالاۋعا مۇمكىندىك بەرەدى. سوڭعى ءتورت جىل بويى بۇل مونيتورينگ حالىقتىڭ سالاۋاتتى مىنەز-قۇلقىنىڭ ديناميكاسىن جانە نەگىزگى مىنەز-قۇلىقتىق ءقاۋىپ فاكتورلارىنىڭ تارالۋىن جۇيەلى تۇردە باقىلاۋعا مۇمكىندىك بەرىپ كەلەدى. ولاردىڭ قاتارىنا تەمەكى شەگۋ، الكوگولدى شامادان تىس تۇتىنۋ، فيزيكالىق بەلسەندىلىكتىڭ تومەندىگى، كوكونىستەر مەن جەمىستەردى جەتكىلىكسىز تۇتىنۋ، سونداي-اق تۇزدى شامادان تىس قولدانۋ جاتادى. اتالعان فاكتورلار سوزىلمالى ينفەكسيالىق ەمەس اۋرۋلاردىڭ دامۋىنا شەشۋشى اسەر ەتەدى. 2025 جىلدىڭ قورىتىندىسى بويىنشا وڭ جانە تۇراقتى ديناميكا تىركەلدى. سالاۋاتتى ءومىر سالتىنا بەيىمدىلىكتىڭ ينتەگرالدى كورسەتكىشى 2024 جىلعى 34،2%-دان 2025 جىلى 35،7%-عا دەيىن ءوستى. سالاۋاتتى ءومىر سالتىنىڭ بارلىق بەس كومپونەنتىن ساقتاۋمەن سيپاتتالاتىن جوعارى دەڭگەيدەگى بەيىمدىلىگى بار ازاماتتاردىڭ ۇلەسى 7،2%-دان 8،4%-عا دەيىن ارتتى. قاناعاتتانارلىق بەيىمدىلىك دەڭگەيىنىڭ كورسەتكىشى دە ءوسىپ، 27،0%-دان 27،3%-عا جەتتى. اتالعان وڭ وزگەرىستەر مەملەكەت پەن قوعام تاراپىنان جۇزەگە اسىرىلىپ جاتقان دەنساۋلىق مادەنيەتىن قالىپتاستىرۋعا، پروفيلاكتيكالىق باعدارلامالاردى دامىتۋعا جانە حالىقتىڭ ءقاۋىپ فاكتورلارى تۋرالى حاباردارلىعىن ارتتىرۋعا باعىتتالعان شارالاردىڭ تيىمدىلىگىن كورسەتەدى. سونىمەن قاتار زەرتتەۋ سالاۋاتتى ءومىر سالتىنا بەيىمدىلىك دەڭگەيىنىڭ الەۋمەتتىك-دەموگرافيالىق ەرەكشەلىكتەرگە تاۋەلدى ەكەنىن انىقتادى. سالاۋاتتى مىنەز-قۇلىقتىڭ نەعۇرلىم تۇراقتى ۇلگىلەرى ايەلدەرگە، جوعارى ءبىلىمى بار ادامدارعا جانە قالا تۇرعىندارىنا ءتان. ال ەر ادامدار، 45–59 جاس ارالىعىنداعى ازاماتتار جانە ءبىلىم دەڭگەيى تومەن توپتار مىنەز-قۇلىقتىق ءقاۋىپ فاكتورلارى بويىنشا ەڭ وسال ساناتتار قاتارىندا قالىپ وتىر. زەرتتەۋ ناتيجەلەرى قازاقستان رەسپۋبليكاسىندا حالىق دەنساۋلىعىن نىعايتۋعا باعىتتالعان قوعامدىق دەنساۋلىق ساقتاۋ ستراتەگيالارىن ودان ءارى تۇزەتۋگە جانە ماقساتتى پروفيلاكتيكالىق ءىس-شارالاردى ازىرلەۋگە ارنالعان عىلىمي نەگىزدەلگەن دالەلدى بازا بولماق.