قازاقستاندا ساياسي پارتيانى تىركەۋ تالاپتارى جەڭىلدەدى

پارتيالاردى تىركەۋگە قويىلاتىن تالاپتار وزگەرەدى.

قازاقستاندا ساياسي پارتيا قۇرىپ، ونى تىركەۋ پروسەسى جەڭىلدەدى. ق ر ادىلەت ۆيسە-مينيسترى الما مۇقانوۆا وسىنداي مالىمدەمە جاسادى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«ساياسي پارتيالاردى تىركەۋگە قويىلاتىن تالاپتار وزگەرەدى. ەندىگى ۋاقىتتا ساياسي پارتيانى تىركەۋ ءۇشىن 20 مىڭ ەمەس، 5 مىڭ مۇشە جەتكىلىكتى. ال وڭىرلىك وكىلدىكتەرىنىڭ سانى 600-دەن 200 ادامعا دەيىن ازايتىلدى. سول سياقتى ساياسي پارتيا قۇرۋ ءۇشىن ازاماتتاردىڭ باستاماشىل توبىنىڭ ەڭ ازى 1 مىڭنان 700 ادامعا دەيىن تومەندەتىلدى. ودان بولەك، پارتيا قۇرۋ جونىندەگى قۇرىلتاي سەزىن وتكىزۋ مەرزىمىن 2 ايدان 3 ايعا دەيىن ۇلعايتۋ بويىنشا تۇزەتۋ كوزدەلگەن»،- دەدى الما مۇقانوۆا وكق-دە وتكەن بريفينگتە.

سونداي-اق، ۆيسە-مينيستردىڭ ايتۋىنشا، جەر جانە ونىڭ رەسۋرستارىن حالىق مەنشىگىنە بەلگىلەۋدە كونستيتۋسيانىڭ 6-بابىنا ناقتىلايتىن تۇزەتۋلەر ەنگىزىلدى.

«كەلەسى زاڭنامالىق وزگەرىس بۇل سۋديالىق لاۋازىمدارعا كونكۋرستىق راسىمدەردى ونلاين-ترانسلياسيالاۋدى ەنگىزۋگە قاتىستى. سول سياقتى نورما شىعارۋ پروسەسىن جەڭىلدەتۋگە جانە نورمالاردى رەتتەۋ دەڭگەيلەرىن ناقتىلاۋعا، ءماسليحات ءتوراعاسى لاۋازىمىن ەنگىزۋگە باعىتتالعان جەكەلەگەن تۇزەتۋلەر قاراستىرىلدى»، - دەيدى ول.
بۇعان دەيىن ق ر پارلامەنتى مەن ۇكىمەتىنىڭ وكىلەتتىگىنە قاتىستى زاڭناماعا ءبىرقاتار وزگەرىس ەنگىزىلگەنىن حابارلاعان ەدىك.