پرەمەر-مينيسترى ءاليحان سمايىلوۆتىڭ توراعالىعىمەن وتكەن كەڭەستە ءبىلىم سالاسىن دامىتۋدىڭ وزەكتى ماسەلەلەرى قارالدى.
وقۋ-اعارتۋ مينيسترلىگى حالىقتىڭ الەۋمەتتىك وسال توپتارىنان شىققان، جەكەمەنشىك مەكتەپتەرگە باراتىن بالالارعا جاپپاي وقىتۋ قورىنان كومەك الۋعا مۇمكىندىك بەرۋدى ۇسىندى، دەپ حابارلايدى Almaty-akshamy.kz.
قازىرگى ۋاقىتتا بۇل نورما مەملەكەتتىك مەكتەپتەردە عانا بار. سونداي-اق قيىن جاعدايعا تاپ بولعان جانە مەملەكەتتىك تاپسىرىس الاتىن بالاباقشالارعا بارۋعا مۇمكىندىگى جوق وتباسىلاردان شىققان بالالاردى تەگىن تاماقتاندىرۋ ماسەلەسى قارالدى.
بۇل شارانى كەلەر جىلى ىسكە قوسىلاتىن «وتباسىنىڭ سيفرلىق كارتاسى» سەرۆيسى ارقىلى جۇزەگە اسىرۋ ۇسىنىلدى. الداعى ۋاقىتتا ازىق-تۇلىك شىعىندارىن تولەۋ ءۇشىن داعدارىس جاعدايىنداعى وتباسىلاردان شىققان بالالار انىقتالادى.
ءاليحان سمايىلوۆ مەملەكەتتىك ورگانداردىڭ قاجەتتى اقپاراتتىق جۇيەلەرىن ينتەگراسيالاۋدى اياقتاۋدى جانە وسى باستامانى قارجىلاندىرۋ تەتىگىن پىسىقتاۋدى تاپسىردى. بۇل رەتتە ول قاراجاتتى ماقساتسىز پايدالانىلماۋى ءۇشىن باقىلاۋدىڭ قاتاڭ بولۋىن ەسكەرتتى. سونىمەن قاتار بالاباقشالارعا ءبىرىڭعاي كەزەكتى ىسكە قوسۋ ماسەلەسى تالقىلاندى. بۇل بيۋدجەت قاراجاتىن ۇنەمدەۋگە جانە ورىنداردى ءبولۋ كەزىندە سىبايلاس جەمقورلىقتى بولدىرماۋعا مۇمكىندىك بەرەدى.