وتاندىق جانە سىرتقى تۋريزم سالاسى كوروناۆيرۋس پاندەمياسىنان كەيىن قالپىنا كەلىپ جاتىر.
ساراپشىلاردىڭ ايتۋىنشا، الداعى قىستا بىلتىرمەن سالىستىرعاندا دەمالۋعا باراتىندار سانى الدەقايدا كوپ بولماق، دەپ حابارلايدى Almaty-akshamy.kz «حابار 24» سايتىنا سىلتەمە جاساپ.
ءبىرى وتاندىق كۋرورتتاردى تاڭداسا، باسقاسى شەتەل اسىپ، جىلى ايماقتاردا تىنىققاندى ءجون كورەدى. شەكتەۋلەر جويىلىپ، قازاقستانعا ۆيزاسىز كەلەتىن ەلدەر ءتىزىمى ۇلعايدى. سونىڭ ارقاسىندا شەتەلدىك تۋريستەر اعىنى ۇلعايادى دەگەن بولجامدار بار. دانيار ساعىمبايەۆ 10 جىل بۇرىن ەلوردا ىرگەسىندەگى قوسشى قالاسىندا دەمالىس ورتالىعىن اشقان. ءقازىر ول جۇمىسشىلارىمەن بىرگە قىسقى ماۋسىمعا دايىندالىپ جاتىر. كاسىپكەردىڭ ايتۋىنشا، مۇندا تەك قازاقستاندىقتار عانا ەمەس، شەتەلدىك تۋريستەر دە كوپ كەلەدى. ويتكەنى ولار ءبىزدىڭ تابيعاتقا جانە قىسقى سپورت تۇرلەرىنە قاتتى قىزىعادى.
«بىزدە قىسقى ويىندار كوپ، حاسكيمەن شاڭعى تەبەدى، حوككەي وينايدى، اتپەن شابادى. كوبىنە گەرمانيانىڭ ادامدارى كەلەدى. وسىندا كەلىپ، ولار ابدەن قىسقى ويىنداردى ويناپ الادى»، - دەمالىس ورتالىعىنىڭ ديرەكتورى دانيار ساعىمبايەۆ.
بيىل وتاندىق قىسقى كۋرورتتار ءۇندىستان، بىرىككەن اراب امىرلىكتەرى، باحرەين سىندى مەملەكەتتەردەن تۋريستەردى كۇتىپ وتىر. ويتكەنى «قازاق تۋريزم» كومپانياسى 10 شاقتى حالىقارالىق كورمەگە قاتىسىپ، ەلىمىزدىڭ دەمالىس ورىندارىن ايتارلىقتاي جارنامالاپ، ءتيىستى كەلىسىم شارتتار جاساستى. شەتەلدىكتەر نەگىزىنەن الماتى وڭىرىندەگى تاۋ-شاڭعى كۋرورتتارىنا كەلەدى. مەملەكەت مۇنداعى دەمالىس ورتالىقتارىن قولداپ، كەيبىر شىعىندارىن وتەۋدى كوزدەپ وتىر.
«تاۋ كۋرورتتارىن ۇستاۋ ءۇشىن جابدىقتار وتە قىمبات. سونىڭ 20% مەملەكەت تاراپىنان وتەۋ قاراستىرىلعان. ەندى جابدىقتاردى جاڭارتۋ كەرەك. قاۋىپسىزدىك ماسەلەسى دە بار. رواد تراك دەگەن دەگەن ۇلكەن جابدىقتار بار. سونىڭ ءبارى قىسقى ءتۋريزمدى دامىتۋعا سەپتىگىن تيگىزەدى»، - دەيدى "Kazakh tourism" ۇك باسپا ءسوز حاتشىسى ەرنۇر كەنجەبەكوۆ.
شەكارالار اشىلعاندىقتان، قازاقستاندىقتار دا شەتەلگە بارىپ بەلسەندى دەمالىپ جاتىر. ءقازىر سىرتقى تۋريزمدە اي سايىن جاڭا باعىتتار اشىلىپ جاتقانىن بايقاۋعا بولادى. مىسالى، ەندى استانا مەن الماتى قالالارىنان ۆەتنام ەلىنە تىكەلەي رەيسپەن ۇشۋعا بولادى.
«قىس كەزىندە قازاقستاندىقتار وڭتۇستىك ازيا ەلدەرىنە بارعاندى ۇناتادى. تايلاند، ۆەتنام سىندى باعىتتار جوعارى سۇرانىسقا يە. بۇل مەملەكەتتەرگە تىكەلەي رەيستەر بار. ءبىزدىڭ تۋريستەر ەگيپەت، تۇركيا، مالديۆ ارالدارىنىڭ كۋرورتتارىن دا جاقسى كورەتىنى بەلگىلى. جالپى قازاقستاندىقتار سۋىق مەزگىلدە جىلى جاققا بارۋعا اۋەس»، - دەدى تۋريستىك اگەنتتىكتىڭ مەنەدجەرى جانار سىزدىقوۆا.
تۋريستىك كومپانيا ماماندارىنىڭ ايتۋىنشا، ءقازىر شەتەلدىك تۋرلاردىڭ قۇنى قولجەتىمدى. تەك مەكتەپ دەمالىسى مەن جاڭا جىل قارساڭىندا عانا ءوسىمدى بايقاۋعا بولادى. ال وتاندىق دەمالىس ورىندارىنداعى 1-2 كۇندىك دەمالىس قۇنى قازاقستاندىقتاردى ءجيى تاڭ قالدىرادى. كوبى بىزدەگى قىزمەت كورسەتۋ ساپاسى بۇل باعاعا تۇرمايدى دەپ ەسەپتەيدى.