ۇن ءوندىرۋ 1،5%-عا ارتتى.
ەڭ قىمبات باعا استانادا، ەڭ تومەنگى باعا پەتروپاۆلدا، دەپ حابارلايدى Almaty-akshamy.kz
2022 جىلدىڭ قاڭتار-قىركۇيەك ايلارىندا ءداندى داقىلدار مەن كوكونىس ۇنىنان، سونداي-اق ولاردىڭ جارماسىنان ۇن ءوندىرۋ 2،3 ملن توننانى قۇرادى، بۇل وتكەن جىلدىڭ قاڭتار-قىركۇيەك ايلارىمەن سالىستىرعاندا 1،5%-عا ارتىق. بۇعان دەيىن وسى كەزەڭدە ءۇش جىل قاتارىنان ءوندىرىس كولەمى تومەندەپ كەلگەن ەدى.
ءوندىرىس كولەمىنىڭ جارتىسىنان استامى ءۇش وبلىسقا عانا تيەسىلى بولدى: قوستاناي (784،1 مىڭ توننا) جانە سولتۇستىك قازاقستان (243،7 مىڭ توننا) وبلىستارى، سونداي-اق شىمكەنت (197،6 مىڭ توننا).
ءوندىرىستىڭ جالپى كولەمىنەن ۇساق ۇنتاقتالعان بيداي نەمەسە ارالاس داندەردەن تارتىلعان ۇن شىعارۋ 2،2 ملن توننانى، بيدايدان باسقا ءداندى داقىلداردان الىنعان ۇساق ۇنتاقتالعان ۇن – 5،8 مىڭ توننانى، بيازى جانە ءىرى كوكونىس ۇنى – 8،3 مىڭ توننانى قۇرادى. تاعى 157،2 مىڭ توننا نان ونىمدەرىن دايىنداۋعا ارنالعان قوسپالارعا تيەسىلى.
ەلىمىزدىڭ ۇن زاۋىتتارى ۇنعا دەگەن سۇرانىستى (ىشكى نارىقتاعى ساتۋ پليۋس ەكسپورت) تولىعىمەن دەرلىك قامتاماسىز ەتەدى: اعىمداعى جىلدىڭ قاڭتار-تامىزىندا – 99%-عا، وتكەن جىلمەن سالىستىرعاندا دەرلىك (99،5%).
ۇن ەكسپورتى 2022 جىلعى قاڭتار-تامىزدا 1،1 ملن توننانى قۇراپ، 28،3%-عا ءوستى. انىقتاما ءۇشىن: ءبىر جىل بۇرىن 11،1%-عا تومەندەۋ بولعان.
بۇل رەتتە ىشكى نارىقتاعى ساتىلىم بىردەن 22،2%-عا تومەندەپ، 838،8 مىڭ توننانى قۇرادى، ال ءبىر جىل بۇرىن 3،6%-عا وسكەن.
بيداي نەمەسە قارا بيداي ۇنىنىڭ ەكسپورتتىق باعاسى اعىمداعى جىلدىڭ قاڭتار-تامىز ايلارىندا وتكەن جىلدىڭ سايكەس كەزەڭىمەن سالىستىرعاندا بىردەن 41،6%-عا ءوستى.
سالىستىرۋ ءۇشىن: ءبىر جىل بۇرىن ۇننىڭ ەكسپورتتىق باعاسىنىڭ ءوسىمى نەبارى 11،9%-دى قۇراسا، 2018 جىلى سايكەس كەزەڭدە باعا 3،7%-عا تومەندەگەن.
ىشكى نارىقتا ۇننىڭ باعاسى تۇتىنۋشىلار ءۇشىن 2022 جىلعى قازاندا جىل باسىنان بەرى رەكوردتىق 41،3%-عا جانە 2021 جىلعى قازانمەن سالىستىرعاندا 44،3%-عا قىمباتتادى.
انىقتاما ءۇشىن: وتكەن جىلدىڭ قازان ايىندا ۇن باعاسىنىڭ ءوسىمى جىل باسىنان بەرى 8%-دى، ال 2020 جىلعى قازانمەن سالىستىرعاندا 10،4%-دى قۇرادى.
ءبىر ايدا، ياعني اعىمداعى جىلدىڭ قازان ايىندا ۇن باعاسى 1،2%-عا ءوستى. جالپى، 2022 جىلدىڭ قاڭتار-قازان ايلارىندا ۇن باعاسىنىڭ ورتاشا ايلىق ءوسىمى 3،5%-دى قۇرادى. سالىستىرۋ ءۇشىن: 2011-2021 جىلدار ارالىعىندا سەكتورداعى باعانىڭ ورتاشا ايلىق ءوسىمى نەبارى 0،8%-دى قۇرادى.
اعىمداعى جىلى ۇن باعاسىنىڭ اي سايىنعى رەكوردتىق ءوسىمى بايقالدى: ساۋىردە – 7،5%-عا، مامىردا – 6،8%-عا. ايتا كەتەيىك، باعانىڭ بۇعان دەيىنگى رەكوردتىق ءوسۋى 10 جىلدان استام ۋاقىت بۇرىن، 2012 جىلعى تامىزدا 5،6%-عا وسكەن.
جوعارى سورتتى بيداي ۇنىنىڭ بولشەك ساۋدا باعاسى 2022 جىلدىڭ قازان ايىندا كەلىسىنە 369 تەڭگەنى، ءبىرىنشى سۇرىپتى – كەلىسىنە 245 تەڭگەنى قۇرادى.
ەڭ قىمبات بيداي ۇنى استانا (447 تەڭگە)، اقتاۋ (411 تەڭگە) جانە شىمكەنت (406 تەڭگە) قالالارىندا، ەڭ ارزانى پاۆلوداردا (292تەڭگە)، اقتوبەدە بولدى.
ءبىرىنشى سۇرىپتى بيداي ۇنىنىڭ كيلوگراممىنا ەڭ جوعارى باعا اقتاۋدا (335 تەڭگە)، الماتىدا (306 تەڭگە) جانە استانادا (298 تەڭگە)، ەڭ تومەنگى باعا پەتروپاۆلدا (145 تەڭگە) ەكەن.