باسەكەلەستىكتى قورعاۋ جانە دامىتۋ اگەنتتىگى زەرتتەۋ جۇرگىزىپ، قۇس ەتى ءوندىرىسى ارتسا دا، يمپورتتىڭ ءالى دە نارىقتىڭ ۇشتەن ءبىرىن قۇرايتىنىن انىقتادى. مۇنىڭ سەبەبى، فەرمەرلەر تەك 66%-دىق سۇرانىستى قامتاماسىز ەتىپ، قالعان 34%-ى شەتەلدەن اكەلىنەدى، دەپ حابارلايدى aqshamnews.kz
نەگىزگى سەبەپ — قازاقستاندىق ءوندىرىستىڭ جوعارى وزىندىك قۇنى. شىعىنداردىڭ كوبى جەمشوپكە كەتەدى، ال ونىڭ باعاسى سىرتقى نارىقتارعا تاۋەلدى. الايدا يمپورتتاۋشىلار اراسىندا دا جاعداي وڭاي ەمەس — نارىقتا ءىرى وندىرۋشىلەر عانا باسىم، ال كىشى كاسىپكەرلەر نارىقتان سىرت قالۋدا.
«90% كۆوتالار بۇرىننان اينالىسىپ جۇرگەن جەتكىزۋشىلەرگە تيەسىلى. ال جاڭادان كاسىپ باستاعان قاتىسۋشىلارعا تەك 10%-ى بەرىلەدى. بۇل باسەكەلەستىكتى شەكتەپ، جاڭا وندىرۋشىلەردىڭ نارىققا شىعۋىنا كەدەرگى جاسايدى»، — دەپ ءتۇسىندىردى باسەكەلەستىكتى قورعاۋ جانە دامىتۋ اگەنتتىگى.
بۇل جاعدايدى شىعىس قازاقستان جانە ۇلىتاۋ وبلىستارىنداعى وتاندىق كوتەرمە جەتكىزۋشىلەر دە پايدالاندى. كەيبىر كومپانيالار وڭىرلەر اراسىندا قايتا ساتۋدى شەكتەپ، ءارتۇرلى باعالاردى بەلگىلەدى. ارينە، بۇل باعاعا وزىندىك اسەرىن تيگىزەتىنى انىق. سونىمەن قاتار، استانا مەن ماڭعىستاۋ وبلىسىندا ساۋدا ۇستەمەلەرى 15%-عا دەيىن كوتەرىلگەنى بايقالدى. ساۋدا مينيسترلىگى جاعدايدى تەكسەرۋگە مىندەتتى بولدى.
«ءبىز ءتيىستى ورگاندارعا جۇيەلى شارالاردى قابىلداۋدى ۇسىندىق. ولاردىڭ ىشىندە — سۋبسيديالاردى حابارلاۋ پروسەسىن اۆتوماتتاندىرۋ، ولاردى ءبولۋدىڭ كريتەرييلەرىن قايتا قاراۋ، نارىق قاتىسۋشىلارىنا قاتىستى كەمسىتۋدى جويۋ جانە ۋاقىتىلى مەملەكەتتىك قولداۋ كورسەتۋ»، — دەپ ءتۇسىندىردى اگەنتتىك.
الايدا، مونوپوليستەر نارىقتى ءالى دە باقىلاپ وتىر. سايكەسىنشە ساۋدا جەلىلەرى ءوز پايداسىن كورۋ ءۇشىن باعانى كوتەرۋگە ءماجبۇر. سالدارىن ەل تۇرعىندارى كورىپ وتىر.