الماتى قالاسىنىڭ پوليسياسى قىلمىس ءجيى تىركەلەتىن ويىن-ساۋىق ورىندارىن انىقتاپ، ولاردىڭ قاۋىپسىزدىك شارالارىن كۇشەيتۋ قاجەتتىگىن مالىمدەدى، دەپ حابارلايدى Aqshamnews.kz
ىشكى ىستەر ءمينيسترى جاريالاعان پروفيلاكتيكا جىلى اياسىندا اۋەزوۆ اۋدانىندا ويىن-ساۋىق مەكەمەلەرىندەگى قاۋىپسىزدىك ماسەلەسى تالقىلاندى. جيىنعا اۋداندىق پوليسيا باسقارماسى، توتەنشە جاعدايلار دەپارتامەنتى، سانيتارلىق-ەپيدەميولوگيالىق قىزمەت ماماندارى، سونداي-اق بار، مەيرامحانا جانە تۇنگى كلۋب يەلەرى قاتىستى.
اۋەزوۆ اۋداندىق پوليسيا باسقارماسىنىڭ باستىعى دانيار مەڭدەبايەۆتىڭ ايتۋىنشا، اۋداندا 65 ويىن-ساۋىق مەكەمەسى بار، ونىڭ 16-سىندا بۇزاقىلىق پەن توبەلەس ءجيى تىركەلەدى. وتكەن جىلى وسى ورىنداردا 61 قىلمىس جاسالعان.
"كوپتەگەن مەكەمەلەر تاجىريبەسى جانە ءتيىستى ليسەنزياسى جوق كۇزەت ۇيىمدارىنىڭ قىزمەتىنە جۇگىنەدى. كۇزەتشىلەر كەلۋشىلەر اراسىنداعى جانجالداردى توقتاتۋدىڭ ورنىنا، ولاردى عيماراتتان شىعارىپ جىبەرۋمەن عانا شەكتەلەدى. بۇل قىلمىستىڭ كوبەيۋىنە ىقپال ەتەدى"، – دەدى مەڭدەبايەۆ.
كوميسسيا وتىرىسىنىڭ قورىتىندىسى بويىنشا ويىن-ساۋىق ورىندارىندا قىلمىستىڭ الدىن الۋ شارالارىن كۇشەيتۋ تۋرالى شەشىم قابىلداندى. سونداي-اق ەسىرتكى ساۋداسىنىڭ جولىن كەسۋ جۇمىستارى باستى نازارعا الىنباق.
ويىن-ساۋىق مەكەمەلەرىنىڭ يەلەرىنە:
ليسەنزياسى بار كاسىبي كۇزەت قىزمەتىن قولدانۋ؛
بەينەباقىلاۋ كامەرالارىن ورناتۋ جانە ولاردىڭ سانىن ارتتىرۋ؛
قاقتىعىس جاعدايلارىن ازايتۋ ءۇشىن قوسىمشا قاۋىپسىزدىك شارالارىن قاراستىرۋ مىندەتتەلدى.
الماتى قالاسىنىڭ قۇقىق قورعاۋ ورگاندارى قاۋىپسىزدىك ەرەجەلەرىن بۇزعان ويىن-ساۋىق ورىندارىنا قاتاڭ شارالار قولداناتىنىن ەسكەرتتى.