وزگەرىستەر 14 ساۋىردەن باستاپ كۇشىنە ەندى.
قوسىمشا قۇن سالىعىنىڭ اسىپ كەتۋىن قايتارۋ قاعيدالارىنا وزگەرىستەر ەنگىزىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قارجى مينيسترلىگىنىڭ حابارلاۋىنشا، ونداعى نەگىزگى وزگەرىستەر قوسىلعان قۇن سالىعىن وڭايلاتىلعان قايتارۋ كەزىندە تاۋەكەلدەردى باسقارۋ جۇيەسىن ەنگىزۋگە قاتىستى. بۇل «سۇر» سحەمالاردى قولدانۋ ناتيجەسىندە قوسىلعان قۇن سالىعىنىڭ اسىپ كەتۋىن قايتارۋ مۇمكىندىگىن جويادى.
«بۇعان دەيىن، باق-تا قۇن سالىعىنىڭ اسىپ كەتۋىن قايتارۋدىڭ جاڭا قاعيدالارى بيزنەس-قوعامداستىقپەن تالقىلاۋسىز قابىلدانعاندىعى جانە سالىق كودەكسىنىڭ نورمالارىنا قايشى كەلەتىنى تۋرالى اقپارات جاريالانعان بولاتىن. وندا سالىق تولەۋشىلەر قۇن سالىعىنىڭ اسىپ كەتۋىن قايتارۋدىڭ وڭايلاتىلعان ءتارتىبى قۇقىعىنان ايىرىلاتىنى اتاپ وتىلگەن. قارجى مينيسترلىگى جاڭا قاعيدالار سالىق كودەكسىنىڭ 136 جانە 429-باپتارىنا سايكەس ازىرلەنگەنىن جانە ەكسپورتتاۋشىلار مەن سالىق تولەۋشىلەردىڭ باسقا ساناتتارىنا قۇن سالىعىن قايتارۋ بويىنشا بيۋدجەتپەن ءوزارا قارىم-قاتىناستاردى رەتتەيتىنىن حابارلايدى. وزگەرىستەر بيىلعى 14 ساۋىردەن باستاپ كۇشىنە ەندى»، - دەلىنگەن ۆەدومستۆونىڭ حابارلاماسىندا.
اكتىنى ازىرلەۋ كەزىندە بيزنەس-قاۋىمداستىقتىڭ ەسكەرتۋلەرى مەن ۇسىنىستارى ەسكەرىلگەن. 2022 جىلعى 25 قاڭتار مەن 8 اقپان ارالىعىندا بۇيرىق جوباسى جاريا تالقىلاۋ ءۇشىن legalacts.egov.kz سايتىنا ورنالاستىرىلدى. بارلىق ەسكەرتۋلەر مەن ۇسىنىستارعا نەگىزدەلگەن جاۋاپتار دا بەرىلدى. تيىسىنشە، نورماتيۆتىك قۇقىقتىق اكتىلەرگە وزگەرىستەر ەنگىزۋدىڭ بارلىق راسىمدەرى مەن مەرزىمدەرى ساقتالعان.
«جاڭا قاعيدالارعا سايكەس، ەندى تەكسەرۋلەر بارىسىندا ءوزارا بايلانىستى تاراپتار ارقىلى جەتكىزۋشىلەرمەن ءوزارا ەسەپ ايىرىسۋلارعا تالداۋ جۇرگىزىلەتىن بولادى، بۇل سۇر سحەمالاردى قولدانۋ ناتيجەسىندە پايدا بولاتىن قۇن سالىعىنىڭ اسىپ كەتۋىن قايتارۋ مۇمكىندىگىن جويادى. سونداي-اق تەكسەرۋلەردىڭ پراكتيكالىق تاجىريبەسىنە سۇيەنە وتىرىپ، قاعيدالارعا ماتىندىك تۇجىرىمداردىڭ ورنىنا ەسەپتەۋدىڭ ماتەماتيكالىق فورمۋلالارى ەنگىزىلدى. فورمۋلالار زاڭناما نورمالارىن قولدانۋدىڭ بىركەلكى پراكتيكاسىن ەنگىزۋگە ىقپال ەتەدى جانە سومانى دۇرىس انىقتاماۋ ءقاۋپىن، تەكسەرۋشىنىڭ سۋبەكتيۆتى باعاسىن جويادى»، - دەپ جازىلعان مينيسترلىكتىڭ حابارلاماسىندا.
بۇدان باسقا، بۇرىن قولدانىستا بولعان 15 تەرىس ولشەمشارت 12-گە دەيىن قىسقارتىلدى، ادال وندىرۋشىلەردى قولداۋعا باعىتتالعان قوسىمشا 12 وڭ ولشەمشارت ەنگىزىلدى. ونى ەسەپتەۋ ءتارتىبى دە جەتىلدىرىلدى، ەگەر بۇرىن تاۋەكەل فاكتىسى ءۇشىن تەرىس بالل بەرىلسە، جاڭا قاعيدالار بويىنشا باللدار تاۋەكەل اۋقىمى بويىنشا بەرىلەدى. وسىلايشا، ۆەدومستۆو جاڭا قاعيدالار وڭ سالىق تاريحى بار ادال ءوندىرۋشى كاسىپورىنداردى ىنتالاندىراتىنىنا جانە بيزنەستىڭ بارلىق قاتىسۋشىلارىنا تەڭ جاعداي جاساۋعا ىقپال ەتەتىنىنە سەنىمدى.