2024 جىلى قازاقستاندا قاتەرلى ىسىكتى ەرتە دياگنوستيكالاۋعا ارنالعان ءۇش بىرەگەي راديوفارمپرەپارات شىعارۋدى جولعا قويعان ق ر ءپىب مەديسينالىق ورتالىعى اۋرۋحاناسىنىڭ يادرولىق مەديسينا ورتالىعى ماڭىزدى جەتىستىككە قول جەتكىزدى.
بۇل پرەپاراتتار پەت/كت دياگنوستيكاسى ءۇشىن ازىرلەنگەن جانە ەلىمىزدەگى ونكولوگيالىق اۋرۋلاردى ەرتە كەزەڭدە انىقتاۋعا ۇلكەن مۇمكىندىكتەر اشادى. 2025 جىلى تاعى ەكى جاڭا راديوفارمپرەپاراتتى وندىرىسكە ەنگىزۋ جوسپارلانىپ وتىر، دەپ حابارلايدى aqshamnews.kz.
يادرولىق مەديسينا ورتالىعىنىڭ باسشىسى، مەديسينا عىلىمدارىنىڭ دوكتورى ايگۇل ءسادۋاقاسوۆا اتاپ وتكەندەي، 2024 جىل ورتالىق ءۇشىن ەرەكشە جىل بولدى. وسى جىل ىشىندە راديويزوتوپتىق زەرتتەۋلەر كولەمى ەداۋىر ارتتى، 12 مىڭنان استام تالداۋ جاسالدى، بۇل كورسەتكىش وتكەن جىلمەن سالىستىرعاندا 40% كوپ. جاڭا تەحنولوگيالار مەن يننوۆاسيالىق پرەپاراتتار قاتەرلى ىسىك اۋرۋلارىن ەرتە كەزەڭدە انىقتاۋعا مۇمكىندىك بەرەدى.
قازاقستاندا العاش رەت ءۇش بىرەگەي راديوفارمپرەپارات شىعارىلدى. اتاپ ايتقاندا 18F-FDG، 18F-FAT، جانە 68GA-API پرەپاراتتارى. بۇل پرەپاراتتار دارىگەرلەرگە باسقا ادىستەرمەن بايقالۋى قيىن ىسىكتەردى كورۋگە كومەكتەسەدى. سونىمەن جەكە-جەكە توقتالساق:
- 18F-FDG پرەپاراتى اعزاداعى قاتەرلى ىسىك جاسۋشالارىن انىقتاۋعا جانە پروسەستىڭ قانشالىقتى بەلسەندى ءجۇرىپ جاتقانىن كورۋگە مۇمكىندىك بەرەدى.
- 18F-FAT پرەپاراتى ميداعى ىسىكتەردى انىقتاۋعا ارنالعان.
- 68GA-API پرەپاراتى باۋىر، وكپە، ۇيقى بەزى، اسقازان جانە باسقا ىشكى ورگاندارداعى ىسىكتەردى انىقتاۋعا كومەكتەسەدى.
ايگۇل ءسادۋاقاسوۆا اتاپ وتكەندەي، بۇل پرەپاراتتار ناۋقاستاردىڭ جاعدايىن دالىرەك انىقتاۋعا مۇمكىندىك بەرەدى. قاراپايىم جاعدايلاردا دياگنوز قويۋ قيىن ىسىكتەردى انىقتاۋ مۇمكىندىگى مەديسينانىڭ جاڭا كەزەڭىنە كوشۋىن كورسەتەدى. سونىمەن قاتار، پرەپاراتتاردىڭ دەنەدەن تەز شىعىپ كەتۋى پاسيەنتتەر ءۇشىن ءقاۋىپسىز بولۋىن قامتاماسىز ەتەدى.
ورتالىقتىڭ تاعى ءبىر جەتىستىگى – «ساماريا» تەرانوستيكالىق پرەپاراتىنىڭ ەنگىزىلۋى. «تەرانوستيكا» تەرمينى «تەراپيا» جانە «دياگنوستيكا» سوزدەرىنەن قۇرالعان جانە ول ءبىر يزوتوپپەن دياگنوز قويىپ، ەمدەۋگە مۇمكىندىك بەرەدى. بۇل تەحنولوگيا الەمدە قارقىندى دامىپ كەلە جاتقان باعىت بولىپ تابىلادى جانە قازاقستاندا دا وسى سالانى دامىتۋعا ۇلكەن ءمان بەرىلەدى.
ورتالىق جاڭا تەحنولوگيالاردى ەنگىزۋ مەن عىلىمي ىنتىماقتاستىقتى كۇشەيتۋ بويىنشا بەلسەندى جۇمىستار جۇرگىزۋدە. الداعى ۋاقىتتا 18F-PSMA جانە 68Ga-PSMA پرەپاراتتارىن ەنگىزۋ جوسپارلانۋدا. بۇل پرەپاراتتار ەرلەر اراسىنداعى ونكولوگيامەن كۇرەسۋگە كومەكتەسەدى. سونىمەن قاتار، يادرولىق مەديسينا ورتالىعى 18F-FDG راديوفارماسيەۆتيكالىق پرەپاراتىن تىركەۋدى اياقتادى، بۇل پرەپاراتتى باسقا مەديسينالىق ۇيىمدارعا ساتۋعا دايىن.
2022 جىلى اشىلعان يادرولىق مەديسينا ورتالىعى حالىقارالىق GMP ستاندارتتارىنا سايكەس جۇمىس ىستەيتىن بىرەگەي مەكەمە بولىپ تابىلادى. ورتالىق قاتەرلى ىسىك اۋرۋلارىن انىقتاۋدىڭ جاڭا جولدارىن اشىپ، قازاقستانداعى يادرولىق مەديسينانى دامىتۋعا ەلەۋلى ۇلەس قوسۋدا.