وتكەن جىلى حالىقتىڭ قارتايۋ يندەكسى 26،6 بولعان.
ەلىمىزدە قارتايۋ يندەكسى ءوسىپ جاتىر. بۇل تۋرالى ۇلتتىق ستاتيستيكا بيۋروسى مالىمەتىندە ايتىلعان، دەپ حابارلادى Almaty-akshamy.kz.
2021 جىلى وڭىرلەردە حالىقتىڭ قارتايۋ يندەكسى 26،6 بولعان. بۇل ەلىمىزدە 0-15 جاس ارالىعىنداعى ءاربىر 100 بالاعا 65 جاستان اسقان 26،6 ازامات كەلەدى دەگەن ءسوز. 2017 جىلى بۇل كورسەتكىش 25،9 دەڭگەيىندە بولعان.
اۋىلدىق جەرلەرمەن سالىستىرعاندا، قالالاردا قارتايۋ دەڭگەيى جوعارى – 28،7. 2019-2020 جىلدار ارالىعىندا قالا يندەكسى 29،1 دەڭگەيىندە باعالاندى.
«وڭىرلەر اراسىندا ەڭ جوعارى كورسەتكىش سولتۇستىك قازاقستان وبلىسىندا تىركەلدى. ونداعى يندەكس – 66،5. ەڭ جاس قالا شىمكەنت بولدى، ياعني 100 بالاعا 65 جاستان اسقان 14،3 ادام كەلەدى. ەلوردا تۇرعىندارى دا سالىستىرمالى تۇردە جاس. استانا يندەكسى – 17،3. اۋىل تۇرعىندارىنىڭ قارتايۋ يندەكسى قالا كورسەتكىشىنەن 4،9 تارماققا (23،9) تومەن. كورسەتكىش بەس جىل ىشىندە شامالى وزگەردى. 2017 جىلى 100 بالاعا 22،4 ەرەسەك ادام كەلدى»، – دەلىنگەن حابارلامادا.