لاۋرا مىرزاعالي تارتىپتىك جاۋاپقا تارتىلدى.
الماتى قالاسىنىڭ ادەپ جونىندەگى كەڭەستىڭ شەشىمىمەن الماتى قالالىق قوعامدىق دەنساۋلىق ساقتاۋ دەپارتامەنتى باسشىسىنىڭ ورىنباسارى لاۋرا مىرزاعالي تارتىپتىك جاۋاپقا تارتىلىپ، مەملەكەتتىك قىزمەتتەن بوساتىلدى، دەپ حابارلايدى Almaty-akshamy.kz.
«الماتى قالاسىنىڭ ادەپ جونىندەگى كەڭەستىڭ شەشىمىمەن مەملەكەتتىك قىزمەت بەدەلىنە نۇقسان كەلتىرەتىن تەرىس قىلىعى ءۇشىن الماتى قالاسىنىڭ قوعامدىق دەنساۋلىق ساقتاۋ دەپارتامەنتى باسشىسىنىڭ ورىنباسارى لاۋرا مىرزاعالي تارتىپتىك جاۋاپقا تارتىلدى (مەملەكەتتىك قىزمەتكە ءۇش جىل ىشىندە جۇمىسقا كىرۋگە تىيىم سالىنادى) جانە قازىرگى ۋاقىتتا مەملەكەتتىك قىزمەتتەن بوساتىلدى»، - دەلىنگەن قالالىق اكىمدىكتىڭ باسپا ءسوز قىزمەتىنىڭ حابارلاماسىندا.
بۇعان دەيىن الەۋمەتتىك جەلىلەردە الماتى قالالىق قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى قىزمەتكەرمەن سىياقى تۋرالى ءسوز تالاستىرعان ۆيدەو پايدا بولعان ەدى. كەيىن مەملەكەتتىك قىزمەت ىستەرى اگەنتتىگىنىڭ الماتى قالاسى بويىنشا دەپارتامەنتى دارىگەر لاۋرا مىرزاعاليعا قاتىستى تەكسەرۋ باستالعانىن ءمالىم ەتكەن.