دارىگەرلەر وعان تيتاننان جاسالعان 3D پلاستينا ورناتتى.
№7 قالالىق كلينيكالىق اۋرۋحانادا 20 جاستاعى پاسيەنتتىڭ باس سۇيەگى قايتا قالپىنا كەلتىرىلدى. كۇردەلى وپەراسيا مىندەتتى الەۋمەتتىك مەديسينالىق ساقتاندىرۋ شەڭبەرىندە جاسالدى، دەپ حابارلايدى Almaty-akshamy.kz اۋرۋحانانىڭ باسپا ءسوز قىزمەتىنە سىلتەمە جاساپ.
حابارلاماعا سۇيەنسەك، جاس جىگىتكە وسىمەن ەكىنشى رەت وتا جاسالىپ وتىر. بۇعان دەيىن پاسيەنت جوعارىدان قۇلاپ، اۋىر باس-مي جاراقاتىن العان. العاشىندا ماماندار سۇيەكتى تەسىپ ترەپاناسيا جاساپ، پروتەز ورناتقان بولاتىن.
«پلاستيكالىق وپەراسيادان كەيىن ناۋقاس تاعى قۇلاپ، ورناتىلعان پروتەزدى سىندىرىپ العان. ارىپتەستەرمەن اقىلداسا كەلە، ءبىر مەزەتتە سىنعان اكريل پروتەزدى الىپ تاستاپ، تيتاننان جاسالعان 3D پلاستينا ورناتۋ تۋرالى شەشىم قابىلدادىق»، - دەيدى №2 نەيروحيرۋرگيا بولىمشەسىنىڭ مەڭگەرۋشىسى يلدار قۇرمايەۆ.
ماماننىڭ ايتۋىنشا، كرانيوپلاستيكا دەپ اتالاتىن وتا ادەتتە، باستاعى ۇيىعان قاندى، ىسىكتى العاننان كەيىن، باس سۇيەكتىڭ سىنعان بولىكتەرىن الىپ تاستاعاننان كەيىن جاسالادى. ول ميدىڭ قايتا زاقىمدانۋىنا جول بەرمەي، جاراقاتتان كەيىن بولاتىن اسقىنۋلاردىڭ الدىن الادى.
پاسيەنتتەر وپەراسيادان كەيىن جەتىنشى كۇنى اۋرۋحانادان شىعادى، وتانىڭ ورنى 10-12 كۇننەن سوڭ جازىلادى.
«ءبىزدىڭ بولىمشەدە جىل سايىن باس-مي جاراقاتىن العان 1 مىڭعا جۋىق پاسيەنت ەمدەلەدى. ءبىر جىلدا باس سۇيەك دەفەكتىلەرىن جابۋ بويىنشا 100-گە جۋىق وپەراسيا جاسالادى. ولاردىڭ اراسىندا الماتىنىڭ عانا ەمەس، ەلىمىزدىڭ ءتۇرلى وڭىرلەرىنەن كەلگەن تۇرعىندار دا بار. اكريلدى سەمەنت پروتەزدەردىڭ، تيتان تورشالار مەن پلاستينالاردىڭ ۇلگىسىن قولمەن جانە 3D كومپيۋتەرمەن مودەلدەۋ تاسىلدەرى قولدانىلادى»، – دەيدى يلدار قۇرمايەۆ.