قازاقستان 2029 جىلعا دەيىن قاتتى تۇرمىستىق قالدىقتاردى قايتا وڭدەۋ دەڭگەيىن 40%-عا دەيىن جەتكىزۋدى كوزدەپ وتىر. بۇل تۋرالى ق ر ەكولوگيا جانە تابيعي رەسۋرستار ءمينيسترى ەرلان نىسانبايەۆ مالىمدەدى، دەپ حابارلايدى Aqshamnews.kz
ءمينيستردىڭ ايتۋىنشا، بۇگىندە وسى ماقساتتا جالپى قۇنى 345 ملرد تەڭگەگە باعالاناتىن 67 جوبا ازىرلەنىپ جاتىر. ونىڭ ىشىندە 14 جوباعا 52 ملرد تەڭگە كولەمىندە قارجى بولىنگەن. بۇل باستامالار قاتتى قالدىقتاردى ءتيىمدى باسقارۋعا، قورشاعان ورتاعا زياندى ازايتۋعا جانە ەلىمىزدىڭ ەكولوگيالىق قاۋىپسىزدىگىن ارتتىرۋعا باعىتتالعان.
جوبالاردىڭ 41ء-ى تىكەلەي قايتا وڭدەۋ سالاسىنا ارنالسا، باستى نازار قاعاز، پلاستيك جانە اينەك قالدىقتارىنا ءبولىنىپ وتىر. سەبەبى، ەلىمىزدە وسى ءۇش ماتەريال قالدىقتارىنىڭ كولەمى وتە جوعارى. قازىرگى ۋاقىتتا ەلىمىزدە قالدىقتاردى قايتا وڭدەۋ دەڭگەيى 25،8% شاماسىندا. 2029 جىلعا دەيىن بۇل كورسەتكىشتى كەمىندە 40%-عا دەيىن ارتتىرۋ جوسپاردا بار.
جوبالار اياسىندا جاڭا وڭدەۋ كاسىپورىندارىن ىسكە قوسۋ، بار ينفراقۇرىلىمدى جاڭارتۋ جانە قالدىقتاردى جيناۋ مەن سۇرىپتاۋ جۇيەسىن جەتىلدىرۋ كوزدەلۋدە. ءمينيستردىڭ سوزىنشە، جىل سوڭىنا دەيىن بارلىق 67 جوبا جۇزەگە اسىرىلا باستايدى.
باسپا ءسوز ءماسليحاتىندا جۋرناليستەر تاراپىنان تەكستيل قالدىقتارىن قايتا وڭدەۋ ماسەلەسى دە كوتەرىلدى. مينيستر ەرلان نىسانبايەۆ قازىرگى تاڭدا بۇل باعىتقا قاتىستى جوبالار ەكولوگيالىق كودەكستىڭ 388-بابى شەڭبەرىندە مەملەكەتتىك قولداۋعا جاتپايتىنىن اتاپ ءوتتى. سەبەبى، تەكستيل قالدىقتارىنىڭ جالپى كولەمى ءالى دە از دەڭگەيدە.
الايدا، بۇل ماسەلە دە بولاشاقتا نازاردان تىس قالمايدى. مىسالى، الماتى قالاسىندا جىلىنا 100 توننا تەكستيل قالدىعىن وڭدەيتىن ءىرى كاسىپورىن جۇمىس ىستەپ تۇر. حالىقتىڭ تۇتىنۋ دەڭگەيى ارتقان سايىن تەكستيل قالدىقتارىنىڭ كولەمى دە ۇلعايىپ كەلەدى. سوندىقتان بۇل باعىتتا جۇيەلى ساياسات پەن ۇزاقمەرزىمدى شەشىمدەر قاجەت بولاتىنى ءسوزسىز.
مينيسترلىك قازىرگى ۋاقىتتا قالدىقتاردى باسقارۋ ستراتەگياسىن ازىرلەپ جاتىر. قۇجات تامىز ايىنىڭ سوڭىنا دەيىن ازىرلەنىپ، قوعام وكىلدەرىمەن تالقىلاۋعا ۇسىنىلادى دەپ جوسپارلانىپ وتىر. بۇل – اشىقتىقتى قامتاماسىز ەتۋ جانە ساراپشىلار مەن ازاماتتىق قوعامنىڭ ۇسىنىستارىن ەسكەرە وتىرىپ، ەكولوگيالىق ساياساتتى ءتيىمدى قالىپتاستىرۋعا مۇمكىندىك بەرەدى.
قازاقستاننىڭ قالدىقتاردى باسقارۋ ستراتەگياسى ناقتى جوسپارلارمەن جانە اۋقىمدى جوبالارمەن بەكىپ وتىر. ەكولوگيا جانە تابيعي رەسۋرستار مينيسترلىگى قولعا الىپ جاتقان 67 جوبانىڭ تولىق ىسكە اسۋى ەلىمىزدى ەكولوگيالىق قاۋىپسىزدىك پەن تۇراقتى دامۋ جولىنا باستايدى. قالدىقتاردى قايتا وڭدەۋ ۇلەسىنىڭ 40%-عا جەتۋى – تەك ەكولوگيا ءۇشىن ەمەس، ەكونوميكانىڭ جاڭا سەكتورىن دامىتۋ ءۇشىن دە ماڭىزدى قادام بولماق.