1 تامىزدان باستاپ ەلىمىزدە اۋىل شارۋاشىلىعىنىڭ ساناعى وتپەك
قازاقستاندا ۇلتتىق اۋىل شارۋاشىلىعى ساناعى وتەدى. ونىڭ ءبىرىنشى كەزەڭى 1-31 تامىز ارالىعىندا ونلاين رەجيمدە ءوتىپ، ەكىنشى كەزەڭى 20 قىركۇيەكتە باستالماق. وڭىرلىك كوممۋنيكاسيالار قىزمەتىندە ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسى دەپارتامەنتىنىڭ باسشىسى دارحان يسايەۆ ساناقتىڭ الماتىدا قالاي وتكەلى جاتقانىن ايتتى.
ساناق – اۋىل شارۋاشىلىعى سالاسىن باعالاۋعا مۇمكىندىك بەرەتىن، ونىڭ جاي-كۇيى تۋرالى ناقتى اقپارات الاتىن ۇلكەن زەرتتەۋ. ول بۇۇ ازىق-تۇلىك جانە اۋىل شارۋاشىلىعى ۇيىمىنىڭ 10-شى الەمدىك اۋىل شارۋاشىلىعى ساناعىن جۇرگىزۋ باعدارلاماسىنىڭ اياسىندا قولعا الىندى. ياعني، حالىقارالىق ستاندارتقا ساي ءوتىپ، سيفرلىق تەحنولوگيالار قولدانىلادى.
«الماتى اگرارلىق ايماقتىڭ قاتارىنا جاتپاسا دا، قالادا اۋىل شارۋاشىلىعىنا قاتىسى بار 1000-نان استام كاسىپورىن مەن شامامەن 2400 جەكە شارۋاشىلىق، فەرمەرلىك قوجالىقتار، سونداي-اق وسىمدىك شارۋاشىلىعىمەن، مال شارۋاشىلىعىمەن، بالىق شارۋاشىلىعىمەن رەسمي تۇردە اينالىساتىن جەكە كاسىپكەرلەر تىركەلگەن. ولاردىڭ كوبى قالانىڭ ماڭىندا، كورشى وبلىستاردا جۇمىس ىستەگەنىمەن، الماتى قالاسىندا تىركەلگەندەرى وسى ساناققا قاتىسادى»، - دەپ تولىقتىردى دارحان يسايەۆ.
دارحان يسايەۆتىڭ ايتۋىنشا، الماتىداعى بارلىق نىسان ونلاين فورماتتا ساناققا قاتىسۋى ءتيىس. 28 شىلدەدەن باستاپ 1414 نومىرىنەن SMS-حابارلاما كەلىپ، ولاردى sanaq.gov.kz پورتالىندا ساناققا قاتىسۋعا شاقىرا باستايدى.
پورتالعا تىركەلۋگە ەسپ، SMS نەمەسە eGovMobile قوسىمشاسىنداعى QR-كودتى قولدانىپ، وعان كىرگەن سوڭ 2-سحپ/كفح انكەتاسىن تولتىرادى. بۇل انكەتا جەردى پايدالانۋ تۋرالى اقپاراتتى، تەحنيكالىق قۇرالدى، ينفراقۇرىلىمدى، مال باسىن، ءونىمدى ءوندىرۋ مەن وتكىزۋگە بايلانىستى بۇكىل مالىمەتتى قامتىماق.
سايتقا كىرگەن ادامعا ءجون سىلتەپ وتىراتىن نۇسقاۋلىق تا، تاۋلىك بويى جۇمىس ىستەيتىن SANAQ مىرزا دەيتىن چات-بوت تا بار. انكەتانىڭ تولتىرىلعان بولىگىن ساقتاپ، قالعانىن كەيىن اسىقپاي تولتىرساڭىز دا بولادى.
ساناققا قاتىساتىن ادامنىڭ ينتەرنەتى بولماي، كومپيۋتەرگە قولى جەتپەي جاتسا، ستاتيستيكا دەپارتامەنتىندە، ۆەتەرينارلىق قىزمەت پەن اۋدان اكىمدىكتەرىندە قىزمەت كورسەتەتىن ارناۋلى پۋنكتتەر دە بار. قالادا قاجەتتى تەحنيكامەن جابدىقتالعان وسىنداي بەس پۋنكت جۇمىس ىستەيدى.
سپيكەر بارلىق انكەتادا كورسەتىلگەن اقپاراتتىڭ قۇپيا ساقتالاتىنىن جانە «مەملەكەتتىك ستاتيستيكا تۋرالى» زاڭمەن قورعالعانىن اتاپ ءوتتى. اقپاراتتى سالىق ورگاندارىنا، پوليسياعا نەمەسە باسقا دا مەملەكەتتىك قۇرىلىمدارعا بەرمەيدى، ستاتيستيكالىق تالداۋعا عانا پايدالانادى. بارلىق سۇقباتشىلار مالىمەتتى جاريالامايتىنى تۋرالى مىندەتتەمە الادى، اقپاراتتى ساقتاۋ جۇيەسىنىڭ ءوزى اقپاراتتىق قاۋىپسىزدىك تالاپتارىنا ساي جۇمىس ىستەيدى.
شۇعىل قولداۋ كورسەتۋ ءۇشىن تامىز ايىندا 1446 ءنومىرى بويىنشا ءبىرىڭعاي بايلانىس ورتالىعى دا جۇمىس ىستەيدى، ساناقتىڭ ارناۋلى جەلىسى دە اشىلعان.
ساناقتىڭ الدىن الا شىققان العاشقى قورىتىندىسى 2025 جىلدىڭ جەلتوقسانىندا جاريالانىپ، تۇپكىلىكتى قورىتىندى 2026 جىلى ءبىر-اق شىعادى. بۇل مالىمەتتەر اۋىل شارۋاشىلىعىنىڭ جاعدايىن تالداپ، مەملەكەتتىك قولداۋ كورسەتىپ، ينفراقۇرىلىم سالىپ، ءونىمدى ساقتاۋ مەن وڭدەۋدى جوسپارلاۋعا، سونداي-اق وسى سالاعا سۋبسيديا بولۋگە نەگىز بولماق.
«الماتى قالاسىنىڭ بارلىق اۋىل شارۋاشىلىعى نىساندارىن ساناققا قاتىسۋعا شاقىرامىن. بۇل كوپ ۋاقىت المايدى، ءبىراق ءسىز ساناققا قاتىسۋ ارقىلى وسى سالانىڭ دامۋىنا اتسالىساسىز»، - دەپ قوستى دارحان يسايەۆ.