الماتىدا پاركينسون اۋرۋىن حيرۋرگيالىق ەمدەۋ ورتالىعى اشىلعانىنا - جەتى اي.
سودان بەرگى ارالىقتا پرەزيدەنتتىڭ ءىس باسقارماسىنا قاراستى كلينيكادا 28 وپەراسيا ءساتتى جاسالدى. ولاردىڭ دەنى مىندەتتى الەۋمەتتىك مەديسينالىق ساقتاندىرۋ اياسىندا ءوتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ورتالىق كلينيكالىق اۋرۋحانادا كۇردەلى وتانى بەلگىلى نەيروحيرۋرگ، مەديسينا عىلىمدارىنىڭ كانديداتى شىڭعىس شاشكين باستاعان بىلىكتى ءۇش دارىگەر جاسايدى. ش.شاشكين مي مەن جۇلىنعا نەيروستيمۋلياتور يمپلانتتاۋعا ماماندانعان ەلىمىزدەگى العاشقى نەيروحيرۋرگ.
«الماتىدا كۆوتا بويىنشا وپەراسيا جاسالعان العاشقى ادامنىڭ جاسى – جەتپىستە. ول 8 جىل بۇرىن اۋرۋدىڭ اسقىنعان تۇرىنە شالدىققان. قازاقستان بويىنشا مۇنداي اۋرۋلاردىڭ سانى 30 مىڭعا جۋىقتايدى، كوبىسى ەگدە تارتقان ادامدار. دەگەنمەن، ءوز تاجىريبەمدە 25 جاستاعى ناۋقاستى دا كوردىم»، – دەيدى دارىگەر.
شىڭعىس شاشكين وپەراسيانىڭ قالاي جاسالاتىنىن ايتىپ بەردى. ول ءۇشىن ناۋقاستىڭ ميىنا جىڭىشكە ەلەكترود ەنگىزىلىپ، ول بۇعانا سۇيەگىنىڭ تومەنگى تۇسىندا تەرىنىڭ استىنا ورناتىلعان نەيروستيمۋلياتورعا قوسىلادى. ارينە، ناۋقاس وپەراسيادان كەيىن قۇلان تازا ايىعىپ كەتپەيدى. ءبىراق بۇلشىقەتى ىستەمەي قالعان جانداردىڭ ءومىرى ايتارلىقتاي جاقسارادى.
الەمدە بيوستيمۋلياتور سالۋ بويىنشا العاشقى وپەراسيا 1987 جىلى جاسالعان. ءقازىر نەيروستيمۋلياسيا ءتاسىلى اقش-تا، ەۋروپا مەن ازيانىڭ ءبىرقاتار ەلىندە قولدانىلادى. بۇل ءادىس قازاقستاندا تۇڭعىش رەت 2013 جىلى تاجىريبەدەن وتكىزىلدى. سودان بەرى كۇردەلى وپەراسيا استانا مەن قاراعاندىدا جاسالىپ كەلگەن بولاتىن.
«ورتالىق كلينيكالىق اۋرۋحانا بازاسىندا پاركينسون اۋرۋىن ەمدەيتىن حيرۋرگيالىق ورتالىقتىڭ اشىلعانى تاماشا شەشىم بولدى. ەلىمىزدەگى حالىقتىڭ الپىس پايىزدان استامى وڭتۇستىك وڭىرلەردە شوعىرلانعان. ولاردىڭ وسىعان دەيىن وزدەرى تۇراتىن وڭىردە تەگىن ەمدەلۋگە مۇمكىندىگى بولماعان ەدى. ءقازىر تەگىن وتاعا 29 ادام كەزەكتە تۇر»، – دەيدى ش.شاشكين.
حيرۋرگ پاركينسون اۋرۋىنىڭ الدىن الۋ ءۇشىن سالاۋاتتى ءومىر سالتىن ساقتاپ، كوبىرەك قوزعالىپ، دۇرىس تاماقتانۋ كەرەكتىگىن ايتادى.