قازاقستاندا پاتەرلەردى جالعا بەرۋ باعاسى تومەندەي باستادى

الماتىدا ازىرشە باعانىڭ ارزانداۋى بايقالمايدى.

ساراپشىلار قازاقستاننىڭ كەيبىر قالالارىندا پاتەرلەردى جالعا بەرۋ باعاسى تومەندەي باستاعانىن ايتتى، دەپ حابارلادى Almaty-akshamy.kz Baq.kz سىلتەمە جاساپ. 

«رەسەيدە موبيليزاسيالاۋ جاريالانعاننان كەيىن ەلىمىزدە العاشقى اپتالاردا شارىقتاعان پاتەردى جالعا بەرۋ باعاسى تومەندەي باستادى»، - دەپ اتاپ ءوتتى سايت ساراپشىلارى.

5-12 قازان ارالىعىندا ەلىمىزدىڭ جەتى قالاسىندا جالعا بەرىلەتىن باسپانا باعاسى ورتا ەسەپپەن 10%-عا ارزاندادى. جالداۋ اقىسىنىڭ تومەندەۋى پەتروپاۆل، اقتوبە، پاۆلودار، ورال، استانا، قوستاناي، اتىراۋ قالالارىندا بايقالادى.

بۇل رەتتە الماتى، اقتاۋ، قاراعاندى، وسكەمەن، شىمكەنت قالالارىندا جالداۋ باعاسى قىمباتتادى. سونىمەن قاتار، تۇركىستان، تاراز، كوكشەتاۋ قالالارىندا جالداۋ اقىسى دا، سۇرانىس تا وزگەرمەگەن.

جالداۋ اقىسىنىڭ ءوسۋ شىڭى الماتى قالاسىندا – 30 قىركۇيەك پەن 7 قازان ارالىعىندا، استانادا – 5 قازاننان، ورالدا – 2 قازاننان باستاپ تومەندەگەن.

«الماتىدا ازىرشە باعانىڭ ارزانداۋى بايقالمايدى. بۇل ءىشىنارا نارىق قۇرىلىمىنىڭ وزگەرۋىنە جانە ارزان پاتەرلەردىڭ تاپشىلىعىنا بايلانىستى»، - دەلىنگەن حابارلامادا.