جارىستا ناتيجەگە جەتپەگەن جاتتىقتىرۋشىلارعا سانكسيا سالىنادى

سپورتشىلار ناشار ونەر كورسەتكەن جاعدايدا سۇراۋى بولادى.

قول استىنداعى سپورتشىلار جۇلدەلى ورىن يەلەنىپ، مەدال الماسا، ۇلتتىق قۇراما جاتتىقتىرۋشىلارى جالاقىسىنىڭ جارتىسىن كەرى قايتارادى، دەپ حابارلايدى Almaty-akshamy.kz Inbusiness.kz سىلتەمە جاساپ.

بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتى سپورتتىق قىزمەت تۋرالى شارتتاردا كوزدەلگەن ناتيجەگە قول جەتكىزبەگەنى ءۇشىن ۇلتتىق قۇرامانىڭ جاتتىقتىرۋشىلارىنا سانكسيا سالىناتىنىن جاريالادى. ەندى سپورتشىلار ناشار ونەر كورسەتكەن جاعدايدا سۇراۋى بولادى.

كوميتەتتىڭ اقپاراتى بويىنشا، 2021 جىلعى جەلتوقساندا ەسەپ كوميتەتى توكيودا وتەتىن 2020 وليمپيادا ويىندارىنا دايىندىققا بولىنگەن قاراجاتتى پايدالانۋ بويىنشا اۋديت جۇرگىزگەن.

مەملەكەتتىك اۋديت بارىسىندا جاتتىقتىرۋشىلارعا قاتىستى سانكسيا سالىنباعاندىقتان، سپورتتىق قىزمەت تۋرالى شارتتاردا كوزدەلگەن ناتيجەلەر كورسەتكىشتەرىنە قول جەتكىزبەگەنى ءۇشىن ولارعا قاتىستى ەشقانداي شارا قولدانىلماعانى بەلگىلى بولدى.

سوندىقتان ۇلتتىق وليمپيادا كوميتەتىنە سپورتتىق قىزمەت تۋرالى شارتتاردا كوزدەلگەن ناتيجەگە قول جەتكىزبەگەنى ءۇشىن جاتتىقتىرۋشىلارعا قاتىستى سانكسيالار سالۋ تاپسىرىلدى.

ەسەپ كوميتەتىنىڭ تاپسىرماسىنا سايكەس، "سپورتتى دامىتۋ ديرەكسياسى" ركپ جاتتىقتىرۋشىلارمەن (باس)، سپورتشىلارمەن جاسالاتىن سپورتتىق قىزمەت تۋرالى ۇلگىلىك شارتتار بەكىتىلدى. باس جاتتىقتىرۋشىلارمەن بەكىتىلگەن شارتتىڭ تالابىندا ءتيىستى  كورسەتكىش ورىندالماسا نەمەسە ءتيىستى دەڭگەيدە بولماسا تولەنەتىن سومانىڭ 50%-دان اسپايتىن بولىگى بەرىلەدى.