پايدالانىلماي جاتقان 8،1 ملن گا جەر انىقتالدى.
قازاقستان ۇكىمەتى پايدالانىلماعان اۋىل شارۋاشىلىعى جەرلەرىن ناقتى جۇمىس ىستەيتىندەرگە بەرۋدى كوزدەپ وتىر، دەپ حابارلايدى Almaty-akshamy.kz ElDala.kz سىلتەمە جاساپ.
قازاقستاندا جايىلىمداردىڭ تاپشىلىعى كەزىندە پايدالانىلماي جاتقان 8،1 ملن گا جەر انىقتالدى. تەكسەرۋدەن كەيىن ولاردىڭ ءبىر بولىگىن جەر پايدالانۋشىلارى يگەرە باستادى، ال ءبىر بولىگى مەملەكەتتىك مەنشىككە الىندى. بۇل تۋرالى ق ر پرەمەر-مينيسترىنىڭ باسپا ءسوز قىزمەتى حابارلادى.
ۇكىمەت جانىنداعى ەكونوميكانى مونوپولياسىزداندىرۋ جونىندەگى كوميسسيانىڭ وتىرىسىندا اۋىل شارۋاشىلىعى جەرلەرىن ۇتىمدى پايدالانۋ ماسەلەسى تالقىلاندى.
جىل باسىندا قازاقستان پرەزيدەنتى پايدالانىلمايتىن اۋىل شارۋاشىلىعى ماقساتىنداعى جەرلەردى ماجبۇرلەپ الىپ قويۋ مەرزىمى ەكى جىلدان ءبىر جىلعا دەيىن قىسقارتىلاتىن زاڭعا قول قويدى. بۇل رەتتە كوسمومونيتورينگ ارقىلى مەملەكەتتىك باقىلاۋدىڭ جاڭا تەتىكتەرى ەنگىزىلدى. سونداي-اق، پايدالانىلمايتىن اۋىل شارۋاشىلىعى جەرلەرىنە سالىق مولشەرلەمەلەرى ەكى ەسە ۇلعايتىلدى.
اۋىل شارۋاشىلىعى ءمينيسترى ەربول قاراشوكەيەۆ حابارلاعانداي، 2019-2021 جىلدارى مونيتورينگ بارىسىندا 8،1 ملن گا پايدالانىلمايتىن نەمەسە ماقساتقا ساي پايدالانىلمايتىن اۋىل شارۋاشىلىعى جەرلەرى انىقتالدى. ارەكەت ەتۋ شارالارى قابىلدانعاننان كەيىن، 3،4 ملن گا قولدانىستاعى جەر پايدالانۋشىلار يگەرە باستادى، ال 2،1 ملن گا مەملەكەتتىك مەنشىككە قايتارىلدى.
بۇگىنگى تاڭدا 2،6 ملن گا جەر جەرگىلىكتى اتقارۋشى ورگانداردىڭ قاراۋىندا.
سونىمەن قاتار، 2021 جىلى اۋىل حالقىنىڭ مال جايۋ ءۇشىن جايىلىمعا قاجەتتىلىگى 21 ملن گەكتاردان 14 ملن گەكتارعا دەيىن قىسقاردى، ونىڭ ىشىندە ۇيىمداسقان شارۋاشىلىقتارمەن مەموراندۋمدار جاساسۋ جانە ەلدى مەكەندەردىڭ شەكاراسىن كەڭەيتۋ ەسەبىنەن.
پرەمەر-مينيستر ءاليحان سمايىلوۆ مونيتورينگ پەن جەر پايدالانۋشىلارمەن جۇمىستى جالعاستىرۋ قاجەتتىگىنە نازار اۋداردى.
«اۋىل شارۋاشىلىعى مينيسترلىگىنە جۇمىستى جانداندىرۋدى تاپسىرامىن. پايدالانىلمايتىن اۋىل شارۋاشىلىعى ماقساتىنداعى جەرلەر جەر بەتىندە ناقتى جۇمىس ىستەيتىندەرگە بەرىلۋى ءتيىس»، - دەدى ءاليحان سمايىلوۆ.