وتباسىن قولداۋ ورتالىقتارى قىزمەتىنىڭ تۇجىرىمداماسى ازىرلەنىپ جاتىر. بۇل تۋرالى ءماجىلىس دەپۋتاتتارىنىڭ ساۋالىنا ق ر پرەمەر-مينيسترىنىڭ ورىنباسارى – قارجى ءمينيسترى ەرۇلان جاماۋبايەۆتىڭ جاۋابىندا ايتىلعان، دەپ حابارلايدى Almaty-akshamy.kz Inform.kz-كە سىلتەمە جاساپ.
«ۇكىمەت جەرگىلىكتى اتقارۋشى ورگاندارمەن ومىرلىك قيىن جاعدايعا تاپ بولعان وتباسىلارعا قولداۋ كورسەتۋ، بالالى ايەلدەردى ۋاقىتشا باسپانامەن قامتاماسىز ەتۋ ورتالىقتارىن قۇرۋ جونىندەگى قىزمەتتى ۇيلەستىرۋ بويىنشا جوسپارلى جۇمىس جۇرگىزۋدە. بۇل رەتتە، پرەزيدەنت جانىنداعى ايەلدەر ىستەرى جانە وتباسىلىق دەموگرافيالىق ساياسات جونىندەگى ۇلتتىق كوميسسيانىڭ تاپسىرماسى بويىنشا وتباسىن قولداۋ ورتالىقتارى قىزمەتىنىڭ تۇجىرىمداماسى ازىرلەنۋدە. اتالعان تۇجىرىمداما وتباسىن قولداۋ ورتالىقتارىنىڭ فۋنكسيالارىن، قىزمەت كورسەتۋ كەزىندە ولاردىڭ مەملەكەتتىك ورگاندارمەن جانە باسقا دا ۇيىمدارمەن ءوزارا ءىس-قيمىل الگوريتمدەرىن قامتيدى»، - دەدى ەرۇلان جاماۋبايەۆ.
ونىڭ اتاپ وتۋىنشە، پارلامەنت ءماجىلىسىنىڭ قاراۋىنداعى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە وتباسى ينستيتۋتىن نىعايتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا وتباسىلاردى قولداۋ ورتالىقتارىن قۇرۋ جانە (نەمەسە) ولاردىڭ قىزمەتىن ۇيىمداستىرۋدى جەرگىلىكتى اتقارۋشى ورگانداردىڭ قۇزىرەتىنە بەرۋ قاراستىرىلعان.
«بۇدان بولەك، پرەزيدەنتتىڭ 2022 جىلعى 1 ساۋىردەگى №853 جارلىعىمەن قازاقستان رەسپۋبليكاسىنداعى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسىنا ەنگىزىلگەن وزگەرىستەرگە سايكەس جەرگىلىكتى بيۋدجەت قاراجاتى ەسەبىنەن ءاربىر قالادا جانە اۋداندا جەرگىلىكتى اتقارۋشى ورگانداردىڭ وتباسىن قولداۋ ورتالىقتارىن قۇرۋى كوزدەلگەن. وسىلايشا، وتباسىلاردى قولداۋ ورتالىقتارىن قۇرۋ ءتيىستى جەرگىلىكتى قاراجات ەسەبىنەن بيۋدجەتتىك زاڭناماعا سايكەس جۇرگىزىلەتىن بولادى»، - دەدى ول.