الماتى قالاسىنىڭ اكىمى ەربولات دوسايەۆ سەنبىدە بەلگىلى مەملەكەت جانە قوعام قايراتكەرى، اقىن كاكىمبەك سالىقوۆتىڭ قۇرمەتىنە مەموريالدىق تاقتانىڭ اشىلۋ سالتاناتىنا قاتىستى.
ەسكەرتكىش تاقتا كاكىمبەك سالىقوۆ تۇرعان ءۋاليحانوۆ كوشەسى، 137 ءۇيدىڭ قاسبەتىنە ورناتىلدى. سالتاناتتى شاراعا بەلگىلى قوعام جانە مادەنيەت قايراتكەرلەرى ولجاس سۇلەيمەنوۆ، دۋلات يسابەكوۆ، جانىبەك كارىبجانوۆ، ديپلوماتيالىق كورپۋس، مەملەكەتتىك ورگاندار وكىلدەرى، سونداي-اق اقىننىڭ قىزى مايرا سالىقوۆا قاتىستى.
ەربولات دوسايەۆ ءوز سوزىندە كاكىمبەك سالىقوۆتى ەسكە الۋعا ارنالعان مەموريالدىق تاقتانىڭ سالتاناتتى اشىلۋى قالانىڭ رۋحاني ومىرىندەگى ماڭىزدى وقيعا ەكەنىن اتاپ ءوتتى.
"قازاق پوەزياسىنىڭ كلاسسيگى اتانعان كاكىمبەك سالىقوۆ مەملەكەتتىك قىزمەت پەن ادەبيەتتى ءبىرتۇتاس ۇيلەستىردى.
اقىننىڭ شىعارمالارى الەمنىڭ كوپتەگەن تىلدەرىنە اۋدارىلىپ، ولەڭدەرىنە اندەر جازىلعان. اتاقتى "جەزكيىگى" قازاق دالاسىن ءدۇر سىلكىندىردى. كاكىمبەك سالىقوۆ سونىمەن قاتار كوركەم اۋدارما شەبەرى جانە ۇلتتىق سانا-سەزىمدى قالىپتاستىرۋعا باعا جەتپەس ۇلەس قوسقان بىرەگەي تۇلعا. ول ۇلتتىڭ ماقتانىشى، ءوز ەلىنىڭ ناعىز پاتريوتى بولدى. ونىڭ قالامىنان شىققان شىعارمالار قازاق ادەبيەتىنىڭ التىن قورىنا ەندى"، - دەپ اتاپ ءوتتى قالا اكىمى.
ماسكەۋ ءتۇستى مەتالدار جانە التىن ينستيتۋتىن بىتىرگەننەن كەيىن كاكىمبەك سالىقوۆ كوپتەگەن جىلدار بويى شاحتادا جۇمىس ىستەپ، شەبەردەن جەزقازعان تاۋ-كەن مەتاللۋرگيا كومبيناتىنىڭ شاحتا باستىعىنا دەيىن جەتتى. پارتيالىق جۇمىسقا اۋىسقاننان كەيىن جەزقازعان قالالىق پارتيا كوميتەتىنىڭ ءبىرىنشى حاتشىسى، قازاقستان كومپارتياسى جەزقازعان وبلىستىق كوميتەتىنىڭ ەكىنشى حاتشىسى، كوكپ وك ينسپەكتورى، وزبەكستان كومپارتياسى قاراقالپاق وبلىستىق كوميتەتىنىڭ ءبىرىنشى حاتشىسى قىزمەتتەرىن اتقاردى. ءۇش رەت قازاق كسر جوعارعى كەڭەسىنىڭ دەپۋتاتى بولىپ سايلاندى. لەنين وردەنىمەن، ەكى ەڭبەك قىزىل تۋ وردەنىمەن، حالىقتار دوستىعى وردەنىمەن جانە كوپتەگەن مەدالدارمەن ماراپاتتالعان.
سونداي-اق، ءدال وسى كۇنى الماتىدا بوستاندىق اۋدانىنىڭ «نۇر الاتاۋ» شاعىن اۋدانىندا كورنەكتى اقىننىڭ قۇرمەتىنە كوشە اشىلدى.