قازاقستاندا ورتالىق سايلاۋ كوميسسياسىنىڭ وكىلەتى كەڭەيۋى مۇمكىن

سايلاۋعا باقىلاۋ جۇرگىزەتىن قوعامدىق بىرلەستىكتەر مەن كوممەرسيالىق ەمەس ۇيىمداردى اككرەديتتەۋ وكىلەتى بەرىلمەك.

«اشىق نقا» پورتالىندا كونستيتۋسيالىق زاڭدارعا وزگەرىستەر مەن تۇزەتۋلەر ەنگىزۋدى كوزدەيتىن زاڭنىڭ جوباسى تالقىلانىپ جاتىر. اتالعان قۇجاتتا "سايلاۋ تۋرالى" زاڭعا ەنگىزۋ جوسپارلانعان وزگەرىستەر مەن تۇزەتۋلەردىڭ تىزبەسى بەرىلگەن، دەپ حابارلايدى Almaty-akshamy.kz قازاقپاراتقا سىلتەمە جاساپ.

قۇجاتتىڭ تولىق اتاۋى – «مەملەكەت باسشىسىنىڭ 2022 جىلعى 16 ناۋرىزداعى جولداۋىن ىسكە اسىرۋ ماسەلەلەرى بويىنشا قازاقستان رەسپۋبليكاسىنىڭ كەيبىر كونستيتۋسيالىق زاڭدارىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى. 28 شىلدەگە دەيىن قوعام تالقىسىندا بولاتىن قۇجاتتىڭ جوباسىنا سۇيەنسەك، «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسىنىڭ 1995 جىلعى 28 قىركۇيەكتەگى № 2464 كونستيتۋسيالىق زاڭىنىڭ ونداعان بابىنا 100-گە جۋىق وزگەرىس پەن تۇزەتۋ ۇسىنىلعان. سونىڭ ىشىندە ورتالىق سايلاۋ كوميسسياسىنىڭ وكىلەتى مەن مىندەتىنە قاتىستى ءبىرقاتار وزگەرتۋلەر بار.

ناقتىراق ايتساق، سايلاۋعا باقىلاۋ جۇرگىزەتىن قوعامدىق بىرلەستىكتەر مەن كوممەرسيالىق ەمەس ۇيىمداردى اككرەديتتەۋ وكىلەتى بەرىلمەك.

«16-10) جارعىلىق قىزمەتىنە سايلاۋدى بايقاۋ جونىندەگى قىزمەتتى جۇزەگە اسىرۋ جاتاتىن قوعامدىق بىرلەستىكتەر مەن كوممەرسيالىق ەمەس ۇيىمداردى اككرەديتتەۋ ءتارتىبىن ازىرلەيدى جانە بەكىتەدى؛

16-11) جارعىلىق قىزمەتىنە سايلاۋدى بايقاۋ جونىندەگى قىزمەتتى جۇزەگە اسىرۋ جاتاتىن رەسپۋبليكالىق قوعامدىق بىرلەستىكتەر مەن كوممەرسيالىق ەمەس ۇيىمداردى اككرەديتتەۋدى جۇزەگە اسىرادى؛

16-12) سايلاۋدى، رەفەرەندۋمدى ازىرلەۋ مەن وتكىزۋ كەزەڭىندە سايلاۋ كوميسسيالارىن ۇيىمداستىرۋ مەن ولاردىڭ قىزمەتى ءۇشىن قاجەتتى تاۋارلاردى، جۇمىستار مەن كورسەتىلەتىن قىزمەتتەردى ساتىپ الۋ قاعيدالارىن جانە بەكىتەدى؛

16-13) اۋماقتىق سايلاۋ كوميسسيالارىنىڭ كانديداتتارىنا قويىلاتىن بىلىكتىلىك تالاپتارىن ازىرلەيدى جانە بەكىتەدى»، - دەپ جازىلعان ۇسىنىلىپ وتىرعان زاڭ جوباسىندا.

قولدانىستاعى "سايلاۋ تۋرالى" زاڭنىڭ 12-بابىندا مۇنداي نورما جوق.