قۇنى 36،1 ملرد تەڭگە بولاتىن جوبانىڭ تابىستى ىسكە اسىرىلۋى كاسىپورىننىڭ قاراجانباس كەن ورنىنان كەلەتىن مۇنايدى قايتا وڭدەۋ قۋاتتىلىعىن جىلىنا 1 ميلليوننان 1،5 ميلليون تونناعا دەيىن ارتتىرۋعا مۇمكىندىك بەرەدى. جاڭعىرتۋدىڭ نەگىزگى ناتيجەسى – جوعارى ساپالى جول بيتۋمىن ءوندىرۋ كولەمىن 50%-عا، ياعني 500 مىڭنان 750 مىڭ تونناعا دەيىن ۇلعايتۋ بولماق. بۇل قادام قازاقستان ءۇشىن ستراتەگيالىق ماڭىزعا يە، سەبەبى ول ەلدىڭ جول بيتۋمىنا دەگەن ىشكى سۇرانىسىن تولىق وتەۋگە، اۋقىمدى ينفراقۇرىلىمدىق جوبالاردى ىسكە اسىرۋدى قامتاماسىز ەتۋگە جانە جول قۇرىلىسى سالاسىنا تۇراقتى جەتكىزۋدى جولعا قويۋعا مۇمكىندىك بەرەدى.
جوبا اياسىندا قاراجانباستىڭ اۋىر مۇنايىن قايتا وڭدەۋگە بەيىمدەلگەن جاڭا جوعارى تەحنولوگيالىق جابدىقتار ورناتىلىپ، ەسكى توراپتار تولىقتاي اۋىستىرىلدى جانە اۋقىمدى قۇرىلىس-مونتاج جۇمىستارى جۇرگىزىلدى. بۇل جۇمىستارعا 300-دەن استام جۇمىسشى مەن مامان تارتىلدى.
قازىرگى تاڭدا Caspi Bitum زاۋىتىندا ىسكە قوسۋ-باپتاۋ جۇمىستارىنىڭ سوڭعى كەزەڭى جۇرگىزىلۋدە: شيكى مۇناي قابىلدانۋدا، تەحنولوگيالىق جابدىقتار مەن باسقارۋ جۇيەلەرى جەكە-جەكە سىناقتان ءوتىپ، كەشەندى تۇردە تەكسەرىلۋدە. ءساۋىر ايىندا جاڭعىرتىلعان قۋاتتىلىق بازاسىندا العاشقى سىناقتىق بيتۋم پارتيالارى ءوندىرىلىپ، شامامەن 8 مىڭ توننا ءونىم شىعارۋ جوسپارلانىپ وتىر.
«Caspi Bitum زاۋىتىنىڭ جاڭعىرتىلعان ءوندىرىسىن ىسكە قوسۋ – ەلىمىز ءۇشىن ستراتەگيالىق ماڭىزدى قادام. وتاندىق بيتۋم ءوندىرىسىنىڭ 50%-عا ارتۋى جولداردى سالۋ جانە جوندەۋ قارقىنىن جەدەلدەتۋگە، ولاردىڭ ساپاسى مەن ۇزاق مەرزىمدىلىگىن ارتتىرۋعا جول اشادى. بۇل – ينفراقۇرىلىمدى دامىتۋعا، لوگيستيكانى جاقسارتۋعا جانە اقىر سوڭىندا قازاقستاندىقتاردىڭ ءومىر ءسۇرۋ ساپاسىن ارتتىرۋعا جاسالعان تىكەلەي ينۆەستيسيا. سونداي-اق بۇل – ەلىمىزدىڭ ۇزاقمەرزىمدى مۇناي وڭدەۋ جانە مۇناي-حيميا ونەركاسىبىن دامىتۋ ساياساتى اياسىندا جۇزەگە اسىرىلىپ جاتقان، شيكىزاتتىق باعىتتان تەرەڭ وڭدەۋگە كوشۋ جولىنداعى ماڭىزدى قادام»، – دەپ اتاپ ءوتتى ق ر ەنەرگەتيكا ءمينيسترى ەرلان اقكەنجەنوۆ.
ورتالىق ازياداعى ەڭ ءىرى جول بيتۋمىن ءوندىرۋشى Caspi Bitum زاۋىتىنىڭ جاڭعىرتىلعان ءوندىرىسىن ىسكە قوسۋ قازاقستان رەسپۋبليكاسى ۇكىمەتىنىڭ ەكونوميكالىق ءوسىمدى قامتاماسىز ەتۋ جونىندەگى ءىس-قيمىل جوسپارىنا ەنگىزىلگەن. بۇل شارا ۇلتتىق ينفراقۇرىلىمدىق جوبالاردى جۇزەگە اسىرۋعا ەلەۋلى ۇلەس قوسىپ، ماڭعىستاۋ وبلىسىنىڭ ونەركاسىپتىك الەۋەتىن نىعايتاتىن بولادى.