ءومىر ءۇشىن كۇرەستىڭ بيىكتە وتكەن ءساتى
2025 جىلعى 30 مامىردا الماتى–لوندون باعىتىنداعى اۋە رەيسىندە كۇتپەگەن جاعداي ورىن الدى: جولاۋشىلاردىڭ ءبىرى كەنەتتەن ءوزىن جايسىز سەزىنىپ، جاعدايى كۇرت ناشارلاي باستادى. اۋەدە مەديسينالىق قۇرالدار مەن كومەكتەسەتىن جاعداي شەكتەۋلى بولعاندىقتان، ءاربىر سەكۋندتىڭ قۇنى ارتا ءتۇستى.
سول ساتتە ۇشاق بورتىندا پەريناتولوگيا جانە بالالار كارديوحيرۋرگياسى ورتالىعىنىڭ اكۋشەر-گينەكولوگى، جوعارى ساناتتى دارىگەر سالتانات يساعالييەۆا دا ۇشىپ كەلە جاتقان ەدى. ۋاقىت ۇتتىرماي، ول ناۋقاسقا كومەكتەسۋگە كىرىسىپ، كاسىبي تاجىريبەسى مەن بايسالدى ارەكەتىنىڭ ارقاسىندا جولاۋشىنىڭ جاعدايىن تۇراقتاندىرىپ ۇلگەردى، دەپ حابارلايدى aqshamnews.kz.
پاسيەنتكە العاشقى كومەك كورسەتىلىپ، جاعدايى جاقسارعانشا سالتانات قايرات قىزى جانىنان تابىلدى: تەكسەرۋ جۇرگىزىپ، نۇسقاۋلىقتار بەرىپ، قولىنان كەلگەن بارلىق جاعدايدى جاسادى. جارتى ساعاتتىڭ ىشىندە ايەلدىڭ جاعدايى بىرتىندەپ تۇراقتاپ، جولاۋشى ءۇشىن ۇشۋ ءقاۋىپسىز بولدى.
سالتانات يساعالييەۆا – مەديسينادا 25 جىلدان استام ەڭبەك ءوتىلى بار، اكۋشەرلىك بولىمشەنىڭ جەتەكشىسى. ونىڭ كاسىبي جولىندا 10 مىڭنان استام بوساندىرۋ مەن وپەراسيا، جۇزدەگەن امان قالعان ءسابي جانە العىسىن جاۋدىرعان مىڭداعان پاسيەنت بار.
ونىڭ ەڭبەگى لايىقتى باعاسىن العان: ق ر دەنساۋلىق ساقتاۋ مينيسترلىگىنىڭ «دەنساۋلىق ساقتاۋ ءىسىنىڭ ۇزدىگى» اتاعى، «ماماندىعىنا ادالدىعى ءۇشىن» قۇرمەت مەدالى جانە «اۆيسەننانىڭ التىن جۇلدىزى» توسبەلگىسى – سونىڭ دالەلى.
بۇل وقيعا تەك كاسىبيلىك ەمەس، ناعىز دارىگەرلىك ميسسيا — جاناشىرلىق، جاۋاپكەرشىلىك پەن ءاردايىم كومەكتەسۋگە دايىن تۇرۋدىڭ ۇلگىسى.