2025 جىلى قازاقستاندا ەل ەكونوميكاسى ءۇشىن ماڭىزدى ءىرى ينۆەستيسيالىق جوبالار ىسكە قوسىلادى. بۇل تۋرالى پرەزيدەنت قاسىم-جومارت توقايەۆتىڭ قاتىسۋىمەن وتكەن ۇكىمەتتىڭ كەڭەيتىلگەن وتىرىسىندا پرەمەر-مينيستر ولجاس بەكتەنوۆ مالىمدەدى.
الداعى ۋاقىتتا قۇنى $7،4 ملرد بولاتىن پوليەتيلەن زاۋىتىنىڭ قۇرىلىسى باستالادى. زاۋىت مۇناي حيمياسى سالاسىنىڭ دامۋىنا ىقپال ەتىپ، ەلدىڭ ەكسپورتتىق الەۋەتىن ارتتىرماق. سونىمەن قاتار، قازاقستاننىڭ دامۋ بانكىنىڭ قولداۋىمەن پاۆلودار وبلىسىندا الكيلات شىعاراتىن جاڭا كاسىپورىن سالىنادى. بۇل جوبا جانار-جاعارماي ءوندىرىسىنىڭ ەكولوگيالىق ستاندارتتارىن جاقسارتادى دەپ كۇتىلۋدە.
كومىر حيمياسى سالاسىندا دا اۋقىمدى جوبالار قولعا الىنۋدا. «Qarmet» اكسيونەرلىك قوعامى جىلىنا 200 مىڭ توننا تاس كومىر شايىرىن قايتا وڭدەيتىن جوبانى جۇزەگە اسىرۋعا كىرىستى. جالپى قۇنى $262 ملن بولاتىن بۇل جوبا كومىر حيمياسى ونىمدەرىنىڭ 15 ءتۇرىن شىعارۋدى كوزدەيدى.
سونىمەن قاتار، قىتايدىڭ China Energy كومپانياسى قازاقستانعا $4 ملرد كولەمىندە ينۆەستيسيا سالۋعا نيەت ءبىلدىرىپ وتىر. قاراجات كومىردى تەرەڭ وڭدەيتىن زاۋىت سالۋعا جۇمسالماق. بۇل جوبا ەكولوگيالىق تالاپتاردى ساقتاي وتىرىپ، كومىر حيمياسىن تەرەڭ وڭدەۋ ارقىلى جوعارى ساپالى ونىمدەر شىعارۋعا مۇمكىندىك بەرەدى.
مۇناي جانە كومىر حيمياسى سالاسىنداعى وسى جوبالار قازاقستاننىڭ ەكونوميكالىق الەۋەتىن ارتتىرىپ، ءوندىرىستىڭ ءارتاراپتانۋىنا جانە جاڭا جۇمىس ورىندارىنىڭ اشىلۋىنا ىقپال ەتپەك.