ەلىمىزدىڭ 20 جوعارى وقۋ ورنىنىڭ بازاسىندا جاساندى ينتەللەكت (جي) بويىنشا ماماندار دايارلاۋ باعدارلاماسى ىسكە قوسىلدى. بۇل تۋرالى پرەزيدەنت قاسىم-جومارت توقايەۆتىڭ قاتىسۋىمەن وتكەن ۇكىمەتتىڭ كەڭەيتىلگەن وتىرىسىندا پرەمەر-مينيستر ولجاس بەكتەنوۆ مالىمدەدى.
پرەمەر-مينيستردىڭ ايتۋىنشا، جاساندى ينتەللەكت سالاسىن دامىتۋ «بولاشاق» باعدارلاماسى ارقىلى دا قولداۋ تابۋدا. بۇل باعدارلامانىڭ اياسىندا جي سالاسىنا ارنالعان جەكە كۆوتا ەنگىزىلگەن. سونىمەن قاتار، استانادا مەملەكەت باسشىسىنىڭ تاپسىرماسىمەن حالىقارالىق جاساندى ينتەللەكت ورتالىعى اشىلادى.
ەلىمىزدە «AI-Sana» باعدارلاماسى ىسكە قوسىلىپ، ونىڭ شەڭبەرىندە بيىل 100 مىڭ ستۋدەنت ەكونوميكانىڭ ءارتۇرلى سالالارىنا جاساندى ينتەللەكت ەنگىزۋ بويىنشا قولدانبالى داعدىلاردى مەڭگەرمەك. بۇل باستاما ستۋدەنتتەردىڭ تاجىريبەلىك ءبىلىمىن ارتتىرىپ، ەڭبەك نارىعىندا ولاردىڭ سۇرانىسىن كوبەيتۋگە باعىتتالعان.
سونىمەن بىرگە Astana Hub يننوۆاسيالىق ورتالىعى IT سالاسىندا تابىستى ستارتاپتاردى قولداۋعا جانە دامىتۋعا ارنالعان ءتيىمدى الاڭعا اينالدى. قازىرگى ۋاقىتتا Astana Hub-تا الەمنىڭ ءتۇرلى ەلدەرىنە ونىمدەرىن ەكسپورتتايتىن 1،6 مىڭعا جۋىق IT-كومپانيا تىركەلگەن.
بۇل شارالار قازاقستاننىڭ IT جانە جاساندى ينتەللەكت سالاسىن دامىتۋداعى قارقىندى قادامدارىن كورسەتىپ، ەلدىڭ زاماناۋي تەحنولوگيالىق ورتالىق رەتىندە قالىپتاسۋىنا ىقپال ەتپەك.