پيلوتتىق جوبا ىسكە قوسىلدى.
مۇگەدەكتىك توبىن بەلگىلەۋ ءۇشىن مەديسينالىق-الەۋمەتتىك ساراپتاما جۇرگىزۋدىڭ سىرتتاي فورماتى بويىنشا پيلوتتىق جوبانى ىسكە اسىرۋ شەڭبەرىندە اعىمداعى جىلدىڭ ءبىرىنشى توقسانىندا قازاقستاننىڭ بارلىق وڭىرلەرىنەن 11 مىڭنان استام ءوتىنىم قارالدى، دەپ حابارلايدى Almaty-akshamy.kz.
قازىرگى ۋاقىتتا جوباعا 487 مەديسينالىق ۇيىم قوسىلعان.
«بۇعان دەيىن حابارلانعانداي، ۇلتتىق قوعامدىق سەنىم كەڭەسىنىڭ VI وتىرىسىندا مەملەكەت باسشىسى ەرەكشە قاجەتتىلىكتەرى بار ادامدار ءۇشىن بارىنشا قولايلى جاعداي جاساۋدى، ولاردىڭ ينستانسيالار مەن قاعازباستىلىق بويىنشا ءجۇرۋىن، سونداي-اق قىزمەت كورسەتۋشىلەردىڭ قىزمەت الۋشىلارمەن بايلانىسىن بولدىرماۋدى تاپسىردى. وسى تاپسىرمانى ىسكە اسىرۋ شەڭبەرىندە ق ر ەڭبەك جانە حالىقتى الەۋمەتتىك قورعاۋ مينيسترلىگى دەنساۋلىق ساقتاۋ مەن سيفرلىق دامۋ، يننوۆاسيالار جانە اەروعارىش ونەركاسىبى مينيسترلىكتەرىمەن بىرلەسىپ، قازاقستاننىڭ بارلىق 17 وڭىرىندە پيلوتتىق رەجيمدە مەديسينالىق-الەۋمەتتىك ساراپتاما جۇرگىزۋدىڭ سىرتتاي فورماتى بويىنشا جوبا ىسكە قوسىلدى»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
مۇگەدەكتىك توبىن بەلگىلەۋ بويىنشا قىزمەت الۋ ءۇشىن ءوتىنىش بەرۋشى تەك تۇرعىلىقتى جەرى بويىنشا ەمحاناعا بارىپ، قاجەتتى تەكسەرۋدەن ءوتۋى كەرەك، ال قالعان پروسەستەر اقپاراتتىق جۇيەلەردى ينتەگراسيالاۋ ەسەبىنەن ونىڭ قاتىسۋىنسىز وتەدى.
جالپى، سىرتتاي كۋالاندىرۋعا كوشۋ:
- كورسەتىلەتىن قىزمەتتى الۋشىنىڭ كورسەتىلەتىن قىزمەتتى بەرۋشىمەن تىكەلەي بايلانىسىن بولدىرمايدى، وسىلايشا سىبايلاس جەمقورلىق تاۋەكەلدەرىن تومەندەتەدى؛
- ءماس ساراپتامالىق شەشىمدەرىنىڭ اشىقتىعىن قامتاماسىز ەتەدى؛
- مۇگەدەكتىكتى بەلگىلەۋ جانە مۇگەدەكتىگى بار ادامداردى الەۋمەتتىك قورعاۋ شارالارىن ايقىنداۋ بويىنشا مەملەكەتتىك قىزمەتتەر كورسەتۋدىڭ بيزنەس-پروسەسىن اۆتوماتتاندىرادى؛
- اكىمشىلىك جانە بيۋروكراتيالىق كەدەرگىلەردى جويادى.
پيلوتتىق جوبا ارقىلى 2022 جىلى مۇگەدەكتىكتى بەلگىلەۋ بويىنشا قىزمەتتەردى سىرتتاي كورسەتۋمەن قامتۋدى مۇگەدەكتىگى ادامداردىڭ 20%-ىنا دەيىن جەتكىزۋ جوسپارلانۋدا.