استىق وندىرۋشىلەر نان قىمباتتاۋى مۇمكىن دەگەندى ايتىپ وتىر

سەبەبى ۇن جوق.

قازاقستان ايماقتارىندا ديىرمەندەردىڭ جارتىسى جۇمىسىن توقتاتتى، سونىڭ سالدارىنان ەلدە ۇن تاپشىلىعى تۋىنداۋى مۇمكىن، دەپ حابارلايدى Almaty-akshamy.kz قازاقپاراتقا  سىلتەمە جاساپ.

استىق وڭدەۋشىلەر وداعىنىڭ مالىمەتىنشە، ەلىمىزدە ءبىر جارىم اپتاعا عانا جەتەتىن بيداي قورى قالعان. استىق وسىرۋشىلەر مەن وڭدەۋشىلەر بيدايدى بولىسە الماي، داۋ تۋىپ جاتىر. ەگەر بيداي تاۋسىلسا، بارلىق ديىرمەندەر جۇمىسىن توقتاتۋعا ءماجبۇر بولادى.

ۇيىم ۇسىنعان دەرەكتەردە بۇرىن ديىرمەندەر بيدايدىڭ ءبىر تونناسىن 114 مىڭ تەڭگەدەن ساتىپ السا، ءقازىر باعا 160 مىڭ تەڭگەگە جەتكەنى جازىلعان. ءبىراق ونىڭ ءوزىن تابۋ وڭاي ەمەس. ال ءبىر توننا استىق 160 مىڭ تەڭگە بولسا، ۇننىڭ قۇنى ءقازىردىڭ وزىندە 224 000 تەڭگەنى قۇرايدى. بۇل نارىقتاعى باعاسى 235 مىڭ تەڭگەگە جەتكەنىن كورسەتەدى.

«قوستاناي وبلىسىندا ديىرمەندەردىڭ جارتىسىنان استامى، قاراعاندى وبلىسىندا 15 ديىرمەن جۇمىسىن توقتاتتى. سولتۇستىك قازاقستان، پاۆلودار وبلىستارى مەن الماتىدا دا ديىرمەندەردىڭ باسىم بولىگى جۇمىس ىستەمەي تۇر. ءبىز، ديىرمەنشىلەر، ەكى-ۇش اپتادان بەرى بيداي ساتىپ الا الماي وتىرمىز. سەبەبى ۇسىنىس جوق. وسىنىڭ ناتيجەسىندە ۇن باعاسى قىمباتتايدى. قىمباتشىلىقتان قاشىپ قۇتىلۋ مۇمكىن ەمەس، سەبەبى ءبىز وندىرەتىن ءونىمنىڭ وزىندىك قۇنىنىڭ 85 %-ى شيكىزاتقا تاۋەلدى»، – دەلىنگەن استىق وڭدەۋشىلەر وداعى تاراتقان حابارلامادا.