مۇگەدەكتىگى بار ادامداردىڭ زاڭدى قۇقىقتارىن قامتاماسىز ەتۋ جانە ولار ءۇشىن قولجەتىمدى ورتانى قالىپتاستىرۋ ماقساتىندا 2023 جىلى جەرگىلىكتى اتقارۋشى ورگاندار الەۋمەتتىك ينفراقۇرىلىمنىڭ 4 926 وبەكتىسىن بەيىمدەۋ بويىنشا ءىس-شارالار وتكىزدى.
قازاقستاندا سوڭعى ءۇش جىلدا بارلىعى 13،8 مىڭنان استام نىسان بەيىمدەلدى، دەپ حابارلايدى Almaty-akshamy.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
قازىرگى ۋاقىتتا ەلىمىزدە 2025 جىلعا دەيىن قازاقستان رەسپۋبليكاسىندا مۇگەدەكتىگى بار ادامداردىڭ قۇقىقتارىن قامتاماسىز ەتۋ جانە ءومىر ءسۇرۋ ساپاسىن جاقسارتۋ جونىندەگى ۇلتتىق جوسپار، «امانات» پارتياسىنىڭ 2023 – 2027 جىلدارداعى جول كارتاسى جانە مەملەكەت باسشىسىنىڭ تاپسىرماسى بويىنشا ازىرلەنگەن «حالىقپەن بىرگە» جوباسى ىسكە اسىرىلۋدا.
جوبادا قولجەتىمدىلىكتىڭ ينتەراكتيۆتى كارتاسى سايتىنا ەنگىزىلگەن ەل بويىنشا بەيىمدەلۋگە ءتيىس 35 مىڭنان استام باسىم وبەكتىلەر ايقىندالدى. 2021 – 2022 جىلدارى 8 مىڭنان استام نىسان بەيىمدەلدى. 2023 – 2027 جىلدار كەزەڭىندە جىل سايىن كەمىندە 5 مىڭ وبەكت (5 جىلدا 27 مىڭ) بەيىمدەلۋگە ءتيىس. 2021 – 2022 جىلداردى قوسا العاندا، 2023 جىلدىڭ قورىتىندىسى بويىنشا 13 857 وبەكت بەيىمدەلدى.
2023 جىلى بەيىمدەلۋگە جوسپارلانعان 5416 وبەكتىنىڭ ىشىنەن جەرگىلىكتى اتقارۋشى ورگاندار 4 926 وبەكتىدە بەيىمدەلۋ ءىس-شارالارىن جۇرگىزدى، بۇل جوسپارلانعان كولەمنىڭ 91%-ىن قۇرايدى.
2023 جىلعا ارنالعان بەيىمدەۋ جوسپارىن ىسكە اسىرۋ بويىنشا اقمولا، اقتوبە، الماتى، جامبىل، جەتىسۋ، باتىس قازاقستان، قاراعاندى، قوستاناي، قىزىلوردا، تۇركىستان وبلىستارى تولىق، ءجۇز پايىزدىق وڭ ناتيجە كورسەتۋدە. الماتى قالاسىندا جوسپاردىڭ 90%-دان استامى ىسكە اسىرىلدى. ال، استانا، شىمكەنت، اتىراۋ، اباي، شىعىس قازاقستان، ماڭعىستاۋ، پاۆلودار، ۇلىتاۋ، سولتۇستىك قازاقستان وبلىستارىندا كەرىسىنشە جوسپاردىڭ ورىندالۋى 90 %-دان تومەن بولىپ، جاقسى كورسەتكىش بايقالمايدى.
ماسەلەن، ەل بويىنشا مۇگەدەكتىگى بار ادامداردىڭ بارلىق ساناتتارى ءۇشىن قول جەتىمدى:
- ءبىلىم بەرۋ وبەكتىلەرى – 5847 (مەكتەپتەر، بالاباقشالار جانە ت. ب.)؛
- دەنساۋلىق ساقتاۋ وبەكتىلەرى – 2160 (اۋرۋحانالار، ەمحانالار، دارىگەرلىك امبۋلاتوريالار جانە ت. ب.)
- مادەنيەت وبەكتىلەرى – 1433 (مادەنيەت ۇيلەرى، تەاترلار جانە ت. ب.)؛
- مەكەمەلەر مەن ۇيىمدار (ونىڭ ىشىندە مەملەكەتتىك) – 2695 (جەرگىلىكتى اتقارۋشى ورگاندار، ورتالىق ورگانداردىڭ اۋماقتىق بولىمشەلەرى، ازاماتتارعا ارنالعان ۇكىمەت فيليالدارى جانە ت. ب.)؛
- ساۋدا، قىزمەت كورسەتۋ، ويىن-ساۋىق، قوعامدىق تاماقتانۋ وبەكتىلەرى – 1165 (دۇكەندەر، ساۋدا ورتالىقتارى، كافەلەر، مەيرامحانالار جانە ت.ب.).
- الەۋمەتتىك قورعاۋ وبەكتىلەرى – 178 (ارناۋلى الەۋمەتتىك قىزمەتتەر كورسەتۋ ورتالىقتارى، وڭالتۋ ورتالىقتارى جانە ت. ب.)؛
- سپورت وبەكتىلەرى – 289 (سپورت زالدارى، سپورت سارايلارى جانە ت. ب.)؛
- كولىك ينفراقۇرىلىمى وبەكتىلەرى – 90 (اۆتو/تج ۆوكزالدارى، اۋەجايلار).
وڭىرلەردە مۇگەدەكتىگى بار ادامدار الەۋمەتتىك ينفراقۇرىلىم وبەكتىلەرىنىڭ بەيىمدەلۋ ءىس-شارالارىن جۇرگىزۋدە وڭ ديناميكانى اتاپ وتەدى.
«مەن «امانات» پارتياسىنىڭ فيليالى جانىنداعى وبەكتىلەردى بەيىمدەۋ جونىندەگى وبلىستىق مونيتورينگتىك توپتىڭ مۇشەسىمىن. جۇمىس توبى الەۋمەتتىك ينفراقۇرىلىم وبەكتىلەرىنە، اتاپ ايتقاندا تەمىرجول ۆوكزالىنا، اۆتوۆوكزالعا، حالىق بانكى فيليالىنا، حقكو-عا جانە باسقا دا وبەكتىلەرگە بارعان كەزدە مەن ازاماتتاردىڭ بارلىق ساناتتارى ءۇشىن قولجەتىمدىلىكتى قامتاماسىز ەتۋ بولىگىندە وڭ وزگەرىستەردى بايقادىم. نىساندار مۇگەدەكتەر ارباسىنا، ناشار كورەتىن جانە ناشار ەستيتىن ازاماتتارعا، حالىقتىڭ از قوزعالاتىن توپتارىنا بەيىمدەلگەن. كىرەبەرىس توپتارى تولىعىمەن قايتا جاڭارتۋدان ءوتتى، پاندۋستاردىڭ پارامەترلەرى نورمالارعا سايكەس كەلەدى، تەمىرجول ۆوكزالىندا پەررونعا شىعۋدىڭ ىڭعايلىلىعى ءۇشىن ليفتىلەر ورناتىلدى، بارلىق وبەكتىلەردە سانيتارلىق توراپتار جابدىقتالعان»، – دەدى ءبىرىنشى توپتاعى مۇگەدەكتىگى بار، سولتۇستىك قازاقستان وبلىسى اكىمىنىڭ مۇگەدەكتىگى بار ادامدار ماسەلەلەرى جونىندەگى كەڭەسشىسى ۆلاديمير ەرمان.
سونىمەن قاتار، مەملەكەتتىك باقىلاۋ شەڭبەرىندە ەڭبەك جانە الەۋمەتتىك قورعاۋ كوميتەتىنىڭ اۋماقتىق دەپارتامەنتتەرى 2023 جىلى ەل بويىنشا مەملەكەتتىك باسقارۋ، دەنساۋلىق ساقتاۋ، الەۋمەتتىك قورعاۋ، مادەنيەت جانە ت. ب. سالالارداعى الەۋمەتتىك ينفراقۇرىلىم وبەكتىلەرىنە 1 783 تەكسەرۋ (880 – پروفيلاكتيكالىق باقىلاۋ، 903 – جوسپاردان تىس) جۇرگىزدى. تەكسەرۋ قورىتىندىسى بويىنشا انىقتالعان بۇزۋشىلىقتاردى جويۋ تۋرالى 1 171 ۇيعارىم بەرىلدى، 98،4 ملن تەڭگە سوماسىنا 467 اكىمشىلىك ايىپپۇل سالىندى.
وبەكتىلەردىڭ مەنشىك يەلەرىنە پروفيلاكتيكالىق باقىلاۋ جۇرگىزۋ كەزىندە بۇزۋشىلىقتار العاش رەت انىقتالعان كەزدە ولاردى اكىمشىلىك جاۋاپكەرشىلىككە تارتپاي جويۋ تۋرالى نۇسقامالار عانا بەرىلەتىنىن اتاپ ءوتۋ قاجەت. نۇسقاما بەلگىلەنگەن مەرزىمدە ورىندالماعان جاعدايدا ق ر اقبتك 462-بابى بويىنشا ايىپپۇل سالىنادى.