تۇرعىندار ءوز كۇشىمەن جىلىنا ءبىر رەت جولدى جامايدى
الماتى وبلىسىنىڭ قارعالى اۋىلىنا قاراستى "ناۋرىز" ساياجاي قاۋىمداستىعىنىڭ تۇرعىندارى 20 جىلدان بەرى اۋىل مارتەبەسىن الا الماي ءجۇر، دەپ حابارلايدى Almaty-akshamy.kz كتك تەلەارناسىنا سىلتەمە جاساپ.
"ناۋرىز" ساياجايلار قاۋىمداستىعىندا 4 مىڭنان استام تۇرعىن بار. تۇرعىندار اكىمدىككە بۇل جەردى "ساياجاي" دەۋ قيسىنعا كەلمەيتىنىن ايتقانىمەن، ەشتەڭە ونبەگەن. تۇرعىنداردىڭ ايتۋىنشا، اۋىل مارتەبەسىن بەرۋ ءۇشىن اكىمدىك "500 مىڭنان اقشا جيناڭدار" دەگەن تالاپ قويعان.
"جەر كاداسترىندا جەرگە باعا بەرىپ، جەر قوعامدىعىنا ساراپتاما جاسايدى. ءبارىن 530 مىڭ تەڭگە دەگەن اقشانى قۇرتىپ تۇر. قاراپ تۇرساڭىز، بۇل جەردى ءبىز جەكە تۇرعىن ءۇي قۇرىلىسى رەتىندە مەملەكەتتىك اكت سياقتى ساتىپ العانبىز. كەزىندە 5 مىڭ حالىقتىڭ ىشىندە ءارقايسىسى ساتىپ العان اقشاعا، قولىندا ساتىپ الۋ شارتى بار. 530 مىڭ تەڭگەنى نە سەبەپتەن سۇراپ وتىر؟" - دەيدى ساياجاي تۇرعىنى مادينا ىسقاقوۆا.
اسفالت جوق. تۇرعىندار ءوز كۇشىمەن جىلىنا ءبىر رەت جولدى جامايدى. اۋىل رەتىندە تىركەلمەگەندىكتەن، مۇندا ءالى كۇنگە مەكتەپ جوق. بالاسىن كورشى اۋىلدارعا وقىتۋعا ءماجبۇر.
"بالالار ءتورت اۋىسىممەن وقيدى. ەڭ سوڭعىسى 21:00-دە قايتادى. ءقازىر ءتۇرلى جاعداي بولىپ جاتىر، بالامىز ءۇشىن قورقىپ، جولىنا شىعىپ كۇتىپ تۇرامىز. باراتىن جولدا ماشينا دا جوق، اۆتوبۋس تا جوق. تاسىپ اكەلۋگە تاكسي جالدايمىز"، - دەدى ساياجاي تۇرعىنى كۇنسۇلۋ وتاربايەۆا.
ال اكىمدىك وكىلى "500 مىڭ تەڭگەدەن اقشا جيناۋ" تۋرالى اڭگىمەنى تەرىسكە شىعاردى. ال مەكتەپ قۇرىلىسى بيىل باستالادى دەيدى. ال اۋىل مارتەبەسىن الۋ ءۇشىن ءار تۇرعىن قۇجاتىن جەر كاداسترىنا وتكىزۋ كەرەك ەكەن.
"ءبىرىنشى جەردىڭ باعالاۋ قۇنى اكتىسىن جاساۋ كەرەك. ونى كاداستردا جاسايدى. ونى جاساعاننان كەيىن ارىز بەرۋشى جەردىڭ يەسى ەسق كىلتىمەن "ە ليسەنزيا" دەگەن باعدارلاما بار، پورتال بار، ەگوۆ ارقىلى بەرەسىزدەر. شەشىم شىعارۋ 15 كۇندە قارالادى عوي"، - دەيدى قارعالى اۋىل وكرۋگى اكىمىنىڭ ورىنباسارى قۋانىش باتىربايەۆ.
تۇرعىنداردىڭ كوبى اكىمدىك ايتقان قۇجاتتاردى وسىعان دەيىن دە وتكىزگەنىن ايتادى. الايدا ەش ناتيجە شىقپاعان. "ناۋرىزدىڭ" ءوز الدىنا اۋىلعا اينالۋ ماسەلەسىن وبلىس دەڭگەيىندە قارالعانىن قالايدى.