قازاقستاندا 2025 جىلعى 1 قاڭتاردان باستاپ كۇشىنە ەنگەن جاڭا جەڭىلدەتىلگەن ەرەجەلەر بويىنشا مەملەكەتتىك ساتىپ الۋ تۋرالى العاشقى شارتتار جاسالدى، دەپ حابارلايدى aqshamnews.kz.
ولاردى قابىلداۋ جوبالاردى، سونىڭ ىشىندە الەۋمەتتىك ماڭىزى بار جوبالاردى جەدەل ىسكە قوسۋعا جانە ولاردىڭ باعاسىنىڭ كوتەرىلۋ ءقاۋپىن ازايتۋعا مۇمكىندىك بەرەدى. جەڭىمپازدار نەگىزىنەن جەرگىلىكتى كومپانيالار بولادى، بۇل ايماقتاردىڭ بيزنەسى مەن ەكونوميكاسىنا قولداۋ بولىپ سانالادى.
مەملەكەت باسشىسى 2024 جىلعى 1 شىلدەدە راسىمدەردى وڭايلاتۋعا جانە بيۋروكراتيادان ارىلتۋعا باعىتتالعان «مەملەكەتتىك ساتىپ الۋ تۋرالى» جاڭا زاڭعا قول قويدى. زاڭ شەڭبەرىندە مەملەكەتتىك ساتىپ الۋدى جۇزەگە اسىرۋ مەرزىمىن بارىنشا قىسقارتۋدى قامتيتىن جاڭا ەرەجەلەر قابىلداندى.
ماسەلەن، كونكۋرس تاسىلىمەن وتكىزىلەتىن ساتىپ الۋ بويىنشا ءتيىستى قۇجاتتامانى تالقىلاۋ 5 كۇننەن 2 جۇمىس كۇنىنە دەيىن، وتىنىمدەردى قابىلداۋ — 15 كۇننەن 5 جۇمىس كۇنىنە دەيىن، وتىنىمدەردى قاراۋ جانە قورىتىندىلاۋ — 10 كۇننەن 3 جۇمىس كۇنىنە دەيىن قىسقارتىلدى. وسىلايشا، كونكۋرستار مەن اۋكسيوندار بويىنشا جەڭىمپاز ەڭ كوپ دەگەندە 10 جۇمىس كۇنى ىشىندە انىقتالادى.
رەيتينگتىك-بالدىق جۇيەنى قولدانۋ ارقىلى وتكىزىلەتىن كونكۋرس (اۆتوماتتاندىرىلعان ساتىپ الۋ ءتاسىلى، جەڭىمپازدى ۆەب-پورتال ايقىندايدى) ارقىلى ساتىپ الۋ جەڭىمپازدارى جينالعان ۇپايلار نەگىزىندە 5 جۇمىس كۇنى ىشىندە (بۇرىن مەرزىمى 29 جۇمىس كۇنىن قۇراعان) ايقىندالادى. ولار جۇمىس تاجىريبەسى، تۇراقتى سالىق اۋدارىمدارىنىڭ بولۋى، كەشىكتىرۋلەردىڭ بولماۋى جانە باسقالارى ءۇشىن بەرىلەدى.
باعا ۇسىنىستارىن سۇراتۋ تاسىلىمەن ساتىپ الۋ مەرزىمى 5 كۇننەن 2 كۇنگە دەيىن قىسقارتىلدى.
سونداي-اق جەرگىلىكتى جەتكىزۋشىلەر ءۇشىن شارتتى جەڭىلدىكتەر 1%-دان 2%-عا دەيىن ۇلعايتىلدى.