ءقاۋىپسىز ورتا قۇرۋ ءوز قولىمىزدا

الماتى ءسان جانە قىزمەت كورسەتۋ سالاسى كوللەدجىندە قالاداعى بالالار كولونياسىنىڭ قىزمەتكەرلەرى «جاسوسپىرىمدەردىڭ قىلمىستىق جاۋاپكەرشىلىگى» دەگەن تاقىرىپتا كەزدەسۋ وتكىزدى، دەپ حابارلايدى aqshamnews.kz

وعان الماتى قالاسى قىلمىستىق-اتقارۋ جۇيەسى دەپارتامەنتىنە قاراستى №11 مەكەمەنىڭ  قىزمەتكەرلەرى – رەجيم جانە كۇزەت ءبولىمىنىڭ باستىعى ادىلەت مايورى ازامات قانافين ازامات، مەكەمە باستىعىنىڭ كەزەكشى كومەكشىسى ادىلەت مايورى انار مۇستافايەۆ، رەجيم جانە كۇزەت ءبولىمىنىڭ باقىلاۋشىسى ادىلەت سەرجانتى مولدابەك ازامات قاتىستى. كەزدەسۋ بارىسىندا تۇزەۋ مەكەمەسىنىڭ قىزمەتكەرلەرى جەتكىنشەكتەرگە ەلىمىزدەگى زاڭدار تۋرالى، ولاردىڭ ارتىقشىلىقتارى، قۇقىقتىق جاۋاپكەرشىلىك جايىندا اڭگىمە ءوربىتتى. قۇقىق سالاسىنىڭ ماماندارى ستۋدەنتتەر قويعان سۇراقتارعا جاۋاپ بەردى. 

كەزدەسۋدىڭ ماقساتى – جاستاردىڭ قۇقىقتىق ءبىلىمىن تەكسەرە وتىرىپ، ولارعا زاڭ الدىنداعى جاۋاپكەرشىلىگىن ءتۇسىندىرۋ، ساۋاتىن ارتتىرۋ، قىلمىستىق جاۋاپكەرشىلىك تۋرالى تۇسىنىك بەرۋ. 

– ءبىزدىڭ تۇزەۋ مەكەمەسىندە باس بوستاندىعىنان ايىرىلعان جاسوسپىرىمدەر جازاسىن وتەپ جاتىر. كوپشىلىگىنىڭ قۇقىقتىق ساۋاتى تومەن. ونداي بالالار جاماندىققا تەز ۇرىنىپ قالادى. ءبىز وسكەلەڭ ۇرپاقتىڭ اتا زاڭىمىزدى، وزگە دە قۇقىقتىق-نورماتيۆتىك اكتىلەردى بۇلجىتپاي ورىنداپ، قۇرمەتتەي بىلگەنىن قالايمىز. «تارتىپكە باعىنعان قۇل بولمايدى». ءبىز جاسوسپىرىمدەردىڭ ءقاۋىپسىز ورتانى وزدەرى دە قالىپتاستىرا الاتىنىن تۇسىندىرگىمىز كەلەدى، – دەيدى №11 مەكەمە باستىعىنىڭ كەزەكشى كومەكشىسى ادىلەت مايورى انار مۇستافايەۆ.