استانادا ددۇ، بۇۇ، ەو-دان جوعارى دەڭگەيدەگى نەگىزگى حالىقارالىق ارىپتەستەردىڭ، جەتەكشى ساراپشىلاردىڭ، ديپلوماتيالىق كورپۋس وكىلدەرىنىڭ قاتىسۋىمەن «قورشاعان ورتانى قورعاۋ ماسەلەلەرى جانە ادام، جانۋارلار مەن قورشاعان ورتانىڭ ءوزارا ىس-ارەكەتى ارقىلى مۇمكىن بولاتىن شەشىمدەر» اتتى دەنساۋلىق ساقتاۋ بويىنشا ارىپتەستەردىڭ ەكىنشى فورۋمى ءوتتى، دەپ حابارلايدى aqshamnews.kz.
دەنساۋلىق ساقتاۋ مينيسترلىگى ددۇ-نىڭ قازاقستانداعى ەلدىك وفيسىمەن بىرلەسە وتىرىپ، قورشاعان ورتانى قورعاۋ سالاسىنداعى نەگىزگى ۇلتتىق باسىمدىقتاردى تالقىلاۋ جانە ەكولوگيالىق فاكتورلاردىڭ ادام دەنساۋلىعىنا تەرىس اسەرىن ازايتۋ بويىنشا بىرلەسكەن كۇش-جىگەرگە شاقىرۋ ءۇشىن بارلىق مۇددەلى تاراپتاردىڭ ەكىنشى كەزدەسۋىن ۇيىمداستىردى.
«پرەزيدەنت قاسىم-جومارت كەمەل ۇلى توقايەۆ ءوزىنىڭ جىل سايىنعى قازاقستان حالقىنا جولداۋىندا ەكولوگيانى جاقسارتۋدى جانە قورشاعان ورتاعا ۇقىپتى قاراۋدى ءبىزدىڭ ۇكىمەت ءۇشىن باسىم باعىت رەتىندە بەلگىلەدى. ءبىزدىڭ وڭىردەگى ەڭ ماڭىزدى ەكولوگيالىق داعدارىستاردىڭ ءبىرى بولىپ تابىلاتىن ارال تەڭىزىنىڭ پروبلەماسى وزەكتى بولىپ قالا بەرەدى. وسى جىلدىڭ كوكتەمىندە قازاقستان ەلىمىزدىڭ كوپتەگەن وڭىرلەرىنە ايتارلىقتاي زالال كەلتىرگەن ەلەۋلى سۋ تاسقىنىنا تاپ بولدى. ءبىزدىڭ فورۋمدى وتكىزۋ ەكولوگيالىق جاعدايدى جاقسارتۋ بويىنشا شارالار قابىلداۋدىڭ وزەكتى قاجەتتىلىگىن كورسەتەدى»، - دەپ اتاپ ءوتتى ق ر دەنساۋلىق ساقتاۋ ءمينيسترى فورۋمعا قاتىسۋشىلارعا ارنالعان كىرىسپە سوزىندە.
ارىپتەستەر فورۋمىنىڭ ەكىنشى وتىرىسىنىڭ ماقساتى دەنساۋلىق ساقتاۋ سالاسىنىڭ نەگىزگى ماسەلەلەرىن، جالپى ەل بويىنشا دا، جەكەلەگەن وڭىرلەردە دە ەكولوگيالىق اپاتتاردىڭ تۋىنداۋىنا نەعۇرلىم وسال ەكولوگيالىق فون مەن قورشاعان ورتانى نىعايتۋعا باعىتتالعان جاقسارتۋ ساياساتى مەن ستراتەگيالاردى تالقىلاۋ بولدى، اتاپ ايتقاندا دوڭگەلەك ۇستەلدە ارال ءوڭىرى پروبلەماسى كوتەرىلدى.
«ددۇ ەۋروپالىق وڭىرلىك بيۋروسىنىڭ اتىنان دەنساۋلىق ءۇشىن II ارىپتەستەر فورۋمىنا شاقىرعانى ءۇشىن مەن شىن جۇرەكتەن العىسىمدى بىلدىرەمىن. بۇگىن ءبىز قىزىلوردا، ۇلىتاۋ جانە اتىراۋ سياقتى وبلىستاردا قورشاعان ورتانىڭ حالىقتىڭ دەنساۋلىعىنا اسەرىن تالقىلادىق. بۇل فورۋم دونورلار مەن ارىپتەستەردى ىنتىماقتاستىققا جانە بىرلەسكەن شارالار قابىلداۋعا شاقىرۋدىڭ تاماشا پلاتفورماسى بولدى. مەن سونداي-اق قازاقستان ۇكىمەتىنە قورشاعان ورتانىڭ ادام دەنساۋلىعىنا اسەرىن زەرتتەۋدە ماڭىزدى ءرول اتقاراتىن «ءبىرىڭعاي دەنساۋلىق» ءتاسىلىن ىسكە اسىرۋداعى ەلەۋلى ىلگەرىلەۋى ءۇشىن ريزاشىلىعىمدى بىلدىرەمىن»، - دەپ اتاپ ءوتتى ددۇ-نىڭ ينفەكسيالىق اۋرۋلار، قورشاعان ورتا جانە دەنساۋلىق جونىندەگى ەۋروپالىق بيۋروسىنىڭ ءبولىم ديرەكتورى روبب باتتلەر.
ددۇ-نىڭ قازاقستانداعى وكىلى، دوكتور سكەندەر سىلانىڭ ايتۋىنشا، قورشاعان ورتا جانە توتەنشە جاعدايلارعا دەن قويۋ سالاسىنداعى كۇش-جىگەردى بىرىكتىرە وتىرىپ، ءبىز دەنساۋلىق ساقتاۋ جۇيەسىن ايتارلىقتاي نىعايتا الامىز.
«قازاقستان جاھاندىق جانە وڭىرلىك ەكولوگيالىق سىن-قاتەرلەردى تالقىلاۋ ءۇشىن ديالوگ الاڭىنا اينالۋعا دايىن. كۇش - جىگەرىمىزدى بىرىكتىرە وتىرىپ، ءبىز قازاقستاندا عانا ەمەس، بۇكىل الەمدە ادامداردىڭ دەنساۋلىعى مەن ءال-اۋقاتىن جاقسارتۋعا ەلەۋلى ۇلەس قوسا الاتىنىمىزعا سەنىمدىمىن"، - دەپ اتاپ ءوتتى ا.ءالنازاروۆا.
وتكىزىلەتىن كەزدەسۋ ناتيجەسىندە ادام، جانۋارلار مەن قورشاعان ورتانىڭ ءوزارا ءىس-قيمىلىنىڭ قيىلىسىندا تۋىندايتىن پروبلەمالاردى شەشۋ ءۇشىن فورۋمعا قاتىسۋشىلار وتكىزەتىن ءىس-شارالار تۋرالى ەسەپ، سونداي-اق سەكتورارالىق جانە ۆەدومستۆوارالىق ىنتىماقتاستىقتى كۇشەيتۋ جونىندەگى ۇسىنىمدار دايىندالاتىنىن اتاپ وتەمىز.