وقۋ جىلىنىڭ باسىنان باستاپ ەلىمىزدىڭ توعىز وڭىرىندە «دوسبولLIKE» بۋللينگكە قارسى باعدارلاماسىن اپروباسيالاۋ جالعاسادى، دەپ حابارلايدى aqshamnews.kz.
وعان 70 مىڭعا جۋىق وقۋشى جانە ءبىلىم بەرۋ ۇيىمدارىنىڭ 5 مىڭنان استام قىزمەتكەرى قاتىسادى. بۇل تۋرالى وقۋ-اعارتۋ مينيسترلىگىنىڭ باسپا ءسوز قىزمەتى حابارلاعان.
«پيلوتتىق باعدارلامانى جۇزەگە اسىرۋ ءۇشىن ايماقتاردى تاڭداۋ كامەلەتكە تولماعاندار اراسىنداعى قۇقىق بۇزۋشىلىق پەن اۋتودەسترۋكتيۆتى مىنەز-قۇلىق كورسەتكىشتەرىن ەسكەرە وتىرىپ جۇرگىزىلدى. باعدارلامانى اپروباسيالاۋ بارىسىندا پيلوتتىق مەكتەپتەردىڭ بارلىق قىزمەتكەرلەرى ءۇشىن مەكتەپ ۇجىمدارىندا داۋلى جاعدايلاردىڭ تۋىنداۋىنا اسەر ەتەتىن سەبەپتەر مەن فاكتورلاردىڭ الدىن الۋ جانە انىقتاۋ بويىنشا وقىتۋ ۇيىمداستىرىلاتىن جانە پراكتيكالىق ءىس-شارالار وتكىزىلەتىن بولادى. سونداي-اق «دوسبولLIKE» باعدارلاماسىن ىسكە اسىرۋدىڭ مىندەتتەرى مەن ادىستەرىن ءتۇسىندىرۋ بويىنشا وقۋشىلار مەن اتا-انالارعا ارنالعان ءتۇرلى ءىس-شارالار قاراستىرىلعان»، دەپ اتاپ ءوتتى وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
ايتا كەتەيىك، اتالعان جۇمىس وقۋ جىلىنىڭ سوڭىنا دەيىن جالعاسادى، بۇل باعدارلامانىڭ ناتيجەلىلىگىن نەعۇرلىم ءتيىمدى باعالاۋعا جانە ونى ەلدىڭ ءبىلىم بەرۋ ۇيىمدارىندا ودان ءارى ەنگىزۋ ءۇشىن قاجەتتى تۇزەتۋلەر ەنگىزۋگە مۇمكىندىك بەرەدى.