قازاقستاندا ماسكا تاعۋ تالاپتارى جەڭىلدەتىلدى

ءۇي-جايلاردا ماسكا تاعۋ مىندەتتى ەمەس.

بۇگىن پرەمەر-مينيستردىڭ ورىنباسارى ەرالى توعجانوۆتىڭ توراعالىعىمەن قازاقستان اۋماعىندا كوروناۆيرۋس ينفەكسياسىنىڭ تارالۋىنىڭ الدىن الۋ جونىندەگى ۆەدومستۆوارالىق كوميسسيانىڭ وتىرىسى ءوتتى، دەپ حابارلايدى Almaty-akshamy.kz Primeminister.kz سايتىنا سىلتەمە جاساپ.

كوميسسيا جۇمىسىنا مەملەكەتتىك ورگانداردىڭ، «اتامەكەن» ۇكپ وكىلدەرى جانە وڭىرلەردىڭ باسشىلارى قاتىستى.

ەلدەگى ەپيدەميولوگيالىق جاعدايدىڭ تۇراقتانۋىن ەسكەرە وتىرىپ، ۆەدومستۆوارالىق كوميسسيا كەلەسىدەي شەشىمدەر قابىلدادى:

- ءۇي-جايلاردا مىندەتتى ماسكا تاعۋ تالابىن الىپ تاستاۋ؛

- مەديسينالىق مەكەمەلەردە (پەرسونال، قىزمەتكەرلەر، پاسيەنتتەر، كەلۋشىلەر) مەديسينالىق ماسكالاردى تاعۋ مىندەتىن ءوز كۇشىندە قالدىرۋ؛

- ادام كوپ جينالاتىن ورىنداردا، قوعامدىق كولىكتە، ۇيىمداسقان ۇجىمداردا ماسكا تاعۋدى ۇسىنىمدىق سيپاتتا قالدىرۋ؛

- ءبىلىم بەرۋ ۇيىمدارىندا وقىتۋدىڭ كابينەتتىك جۇيەسىنە رۇقسات بەرۋ.

سونداي-اق كوميسسيا شەشىمىمەن Pfizer پرەپاراتىمەن ۆاكسينالاۋعا جاتاتىن تۇلعالار كونتينگەنتى كەڭەيتىلەدى، ول مىناداي ساناتتارمەن تولىقتىرىلادى:

- باستاپقى ۆاكسينالاۋدان وتەتىن، پروفيلاكتيكالىق ۆاكسينا العىسى كەلەتىن ادامدار؛

- ءتۇرلى سەبەپتەرمەن شەتەلگە شىعۋ ءۇشىن قايتالاما ەكپە الۋشىلار؛

- شەتەلدە العان ۆاكسينا كۋرسىن اياقتاۋ ءۇشىن ەكپە الۋشى تۇلعالار؛

- COVID-19 ۆيرۋسىنا قارسى ريەۆاكسيناسيا الۋشى بارلىق توپتاعى ادامدار.

وتىرىس سوڭىندا ەرالى توعجانوۆ قولايلى ەپيدەميولوگيالىق جاعدايدى قامتاماسىز ەتۋدىڭ باستى شارتتارىنىڭ ءبىرى ازاماتتاردى ۋاقىتىلى يممۋنداۋ جانە ريەۆاكسينالاۋ ەكەنىن اتاپ ءوتتى. ول اكىمدىكتەرگە كوروناۆيرۋس ينفەكسياسىنا قارسى ەگۋ ناۋقانىن ەرەكشە باقىلاۋعا الۋدى تاپسىردى جانە حالىق اراسىندا ساپالى ءتۇسىندىرۋ جۇمىستارىن جۇرگىزۋ قاجەتتىگىن اتاپ ءوتتى.