ۆەتەريناريا سالاسىنداعى كەمشىلىكتەر ايتىلدى.
مال دارىگەرلەرىنىڭ جالاقىسى كوبەيەدى. اۋىل شارۋاشىلىعى ءمينيسترى ەربول قاراشوكەيەۆتىڭ ايتۋىنشا، ەڭ از ەڭبەكاقىنى مال دارىگەرلەرى الادى، دەپ حابارلايدى Almaty-akshamy.kz Almaty.tv سىلتەمە جاساپ.
كوممۋنالدىق كاسىپورىندارداعى مال دارىگەرلەرىنىڭ ورتاشا ايلىق جالاقىسى وڭىرلەرگە قاراي 80 مىڭ مەن 200 مىڭ تەڭگەنى قۇرايدى. رەسپۋبليكاداعى مال دارىگەرلەرىنىڭ ورتاشا جاسى 40 پەن 55 جاس ارالىعىندا. وسىلايشا اۋىل شارۋاشىلىعى ءمينيسترى ۆەتەريناريا سالاسىنا جوعارى بىلىكتى جاس ماماندار جەتىسپەيتىنىن اتاپ ءوتتى. ماجىلىستەگى ۇكىمەت ساعاتىندا مينيستر بۇل سالاداعى كەمشىلىكتەردى جويۋعا باعىتتالعان قادامداردى اتاپ ايتتى.
«جوعارىدا اتالعان بارلىق ماسەلەلەر قازىرگى ۋاقىتتا ازىرلەنىپ جاتقان «ۆەتەريناريا تۋرالى زاڭعا» وزگەرىستەر مەن تولىقتىرۋلار ەنگىزۋ جونىندەگى زاڭ جوباسىندا كورىنىس تاباتىنىن اتاپ وتكىم كەلىپ وتىر. ونى پارلامەنتكە اعىمداعى جىلدىڭ 3 توقسانىندا ەنگىزۋدى جوسپارلاپ وتىرمىز. اۋىل شارۋاشىلىعى مينيسترلىگىنىڭ ۆەتەريناريا جۇيەسىن جەتىلدىرۋدىڭ نەگىزى، جۇيەسى وسىنداي»، – دەدى ق ر اۋىل شارۋاشىلىعى ءمينيسترى ەربول قاراشوكەيەۆ.