تاجىريبەلەر 2022 جىلعى مامىردىڭ سوڭىنا دەيىن جالعاسادى.
قازاقستاننىڭ جاس اسكەري ۇشقىشتارى بالقاش وقۋ-اۆياسيالىق ورتالىعىندا جاتتىعۋ ۇشۋلارىن ورىندايدى، دەپ حابارلايدى Almaty-akshamy.kz.
«مەملەكەت باسشىسى قاسىم-جومارت توقايەۆتىڭ قازاقستان اسكەرىنىڭ كادرلىق الەۋەتىن ارتتىرۋ جونىندەگى تاپسىرماسىن ىسكە اسىرۋ شەڭبەرىندە اۋە قورعانىسى كۇشتەرى اسكەري ينستيتۋتىنىڭ ءتورتىنشى كۋرس كۋرسانتتارى بالقاش وقۋ-اۆياسيالىق ورتالىعىندا جاتتىعۋ ۇشۋلارىن ورىندايدى»، - دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
مايدان اۆياسياسىنىڭ بولاشاق ۇشقىشتارى بۇل جولى 2021 جىلعى ناۋرىزدا وقۋ-اۆياسيالىق ورتالىققا اكەلىنگەن Aero L-39 Albatros ۇشاقتارىنىڭ جاڭارتىلعان نۇسقاسىندا دايىندالاتىن بولادى.
كۋرسانتتار تاجىريبەلى نۇسقاۋشىلاردىڭ باسشىلىعىمەن ۇشۋ، بيىكتىكتى باعىندىرۋ، 300 كم/ساع جىلدامدىقپەن شەڭبەر جاساپ ۇشۋ جانە قونۋ سياقتى ۇشۋ تەحنيكالارىن مەڭگەرەدى.
«ۇشاقتىڭ بۇل تۇرىمەن دايىندىق كەزىندە تاجىريبەسى مول ۇشقىش-نۇسقاۋشىلار تەوريالىق بىلىمدەرىمىزدى ۇشۋ داعدىلارىنا جەتىلدىرۋگە كومەكتەسەدى. ۇشۋ ەلەمەنتتەرىن ءوز بەتىنشە ورىنداۋ ءوز قابىلەتىمىزگە دەگەن سەنىمدىلىكتى ارتتىرىپ، بولاشاقتا جەتىستىكتەرگە جەتۋگە ىنتالاندىرادى»، – دەپ اتاپ ءوتتى 4 كۋرس كۋرسانتى دياس شامەنوۆ.
كۋرسانتتار اسكەري تاعىلىمداما كەزەڭىندە ءىس جۇزىندە ۇشۋدى ورىنداۋدان وزگە ۇشۋ جۇمىسىن رەتتەيتىن قۇجاتتاردى، ەرەكشە جاعدايداعى ءىس-قيمىل جونىندەگى نۇسقاۋلىقتاردى زەردەلەيدى.
مۇنداي ۇشۋ تاجىريبەسى جوعارى وقۋ ورنىن بىتىرۋشىلەردى وقىتۋدىڭ ماڭىزدى كەزەڭى بولىپ تابىلادى. سونداي-اق، بۇل تاجىريبەلەر 2022 جىلعى مامىردىڭ سوڭىنا دەيىن جالعاسادى. اسكەري وقۋ ورنىن بىتىرگەن كەزدە جاس اسكەري ۇشقىشتاردىڭ ۇشۋ تاجىريبەسى 80 ساعاتتان اساتىن بولادى.
