دوستاس سەرب حالقىنا مول باقىت، قۇت-بەرەكە تىلەدى.
قاسىم-جومارت توقايەۆ الەكساندر ءۆۋچيچتى قازاقستان حالقىنىڭ جانە جەكە ءوزىنىڭ اتىنان سەربيا رەسپۋبليكاسىنىڭ پرەزيدەنتى بولىپ قايتا سايلانۋىمەن قۇتتىقتادى، دەپ حابارلايدى Almaty-akshamy.kz اقورداعا سىلتەمە جاساپ.
«سايلاۋداعى ايقىن جەڭىسىڭىز – وتانداستارىڭىزدىڭ سىزگە جانە سەربيانىڭ دامۋىن باياندى ەتۋگە، ازاماتتارىنىڭ ءال-اۋقاتىن ەسەلەۋگە جانە حالىقارالىق ساحناداعى بەدەلىن ارتتىرۋعا باعىتتالعان سارالى ساياساتىڭىزعا كورسەتكەن كەڭ قولداۋىنىڭ ايعاعى ەكەنى ءسوزسىز. وسى رەتتە، ءسىزدىڭ باسشىلىعىڭىزبەن ەلىڭىز ودان ءارى وركەندەپ، مەرەيى ءارقاشان ۇستەم بولۋىنا تىلەكتەسپىن»، – دەلىنگەن جەدەلحاتتا.
قازاقستان پرەزيدەنتى ەكى ەل اراسىنداعى ءوزارا ءتيىمدى ىنتىماقتاستىققا نەگىزدەلگەن مازمۇندى ساياسي ديالوگ پەن ساۋدا-ەكونوميكالىق بايلانىستاردىڭ اياسى جىلدان-جىلعا كەڭەيىپ كەلە جاتقانىن زور ريزاشىلىقپەن اتاپ ءوتتى. سونداي-اق الەۋەتى زور ىنتىماقتاستىقتى ودان ءارى وركەندەتۋ ءۇشىن سەربيا پرەزيدەنتىمەن بىرلەسە كۇش جۇمىلدىرۋعا دايىن ەكەنىن راستادى.
مەملەكەت باسشىسى سەربيالىق ارىپتەسىنە سارقىلماس كۇش-قۋات، اسا جاۋاپتى قىزمەتى مەن قولعا العان تىڭ باستامالارىنا تولاعاي تابىس، ال دوستاس سەرب حالقىنا مول باقىت، قۇت-بەرەكە تىلەدى.